Wandile Siholobo, Agbiz-hoofekonoom, meen met nog sewe maandelikse skattings wat kom, gee die derde skatting “ ’n mate van gerusstelling oor die akkuraatheid van die data”. 

“In ’n tyd wanneer ons bekommerd was oor die oormatige reën, was daar voorspelbaar baie meer aandag aan hierdie syfers.”

Hoewel dit ’n effense styging is, bly dit van kritieke belang in ’n tyd wanneer daar bekommernis was oor ’n afwaartse hersiening van die oes weens die oormatige reën. “In wese is hierdie oesskatting 16% hoër as die 2023-24 produksieseisoen, wat ’n ordentlike herstel van die droogteseisoen verteenwoordig.”

Die kommersiële mielie-oes word nou op 14,664 miljoen ton geraam – 0,72% of 105 200 ton meer as die vorige skatting. Hierdie syfer is ook 14,12% hoër as verlede jaar se oes van 12,85 miljoen ton. Die gemiddelde opbrengs vir mielies staan op 5,65 ton per hektaar. Die Vrystaat, Mpumalanga en Noordwes sal na verwagting 81% van die mielie-oes lewer.

Die witmielie-oes is op 7,757 miljoen ton geraam, met ’n verwagte opbrengs van 4,85 t/ha, terwyl geelmielies op 6,907 miljoen ton staan met ’n opbrengs van 6,93 t/ha. Objektiewe opbrengsdata vir Mpumalanga is reeds ingesluit, en resultate vir die Vrystaat en Noordwes sal in Mei bekend gemaak word.

Onder die ander somergewasse toon die sonneblomsaadproduksie ’n daling van 3,60% tot 742 800 ton, en sojabone is afwaarts aangepas met 2,47% tot 2,331 miljoen ton. Die grondbone-oes is 3,49% laer op 64 595 ton, en droëbone het met 10,72% gedaal tot 70 540 ton. Sorghum toon egter ’n ligte toename van 0,39% tot 137 970 ton.

Die volgende produksieskatting vir somergewasse word op 27 Mei 2025 bekend gemaak.

OFM Agri cg