Hierdie is deel van ’n breër strategie om die provinsie se landbousektor voor te berei vir ’n nuwe generasie opgeleide landbouprofessionele, sê Emelda Setlhako – die departement se woordvoerder.

Die databasis, wat deur die Noordwes departement van landbou en landelike ontwikkeling bestuur word, is daarop gemik om ’n omvattende en inklusiewe profiel van boere regoor die provinsie op te stel. Die hoofdoel is om boeredienste te belyn met ontwikkelingsinisiatiewe en terselfdertyd praktiese geleenthede vir jong landbougegradueerdes te skep.

Wat besonders is, is dat boerderye wat op die databasis geregistreer is, kwalifiseer om as opleidingsplekke vir gegradueerdes te dien onder die komende 2025/26 Internskapprogram. Hierdie program sal gekwalifiseerde landbougegradueerdes op aktiewe plase plaas vir praktiese leer en vaardigheidsontwikkeling – ’n poging om die gaping tussen akademiese opleiding en professionele indiensneming te oorbrug.

LUR Madoda Sambatha bemagtig opkomende boere in die Bojanala-distrik met strategiese landbousteun. Foto: Facebook

“Boere se deelname is die sleutel tot die sukses van hierdie program. Ons wil hê elke plaas moet ’n platform vir groei wees – nie net in terme van produksie nie, maar ook om die volgende generasie landbouleiers te vorm,” sê LUR Sambatha.

Hy het die groter impak van die inisiatief verder beklemtoon:

“Dit is meer as net ’n administratiewe proses – dit gaan oor die oopmaak van deure vir jongmense wat gereed is om hul merk in landbou te maak. Deur te registreer help boere om die toekoms van die sektor te vorm, bied hulle mentorskap, en kry hulle toegang tot gemotiveerde [voornemende boere] wat vars vaardighede en innovasie na die veld bring.”

Die departement wil ’n volhoubare en vaardigheidsgedrewe landbou-ekonomie in die Noordwes bevorder. Foto: Facebook

Die internskapprogram is ’n hoeksteen van die departement se langtermynvisie om ’n volhoubare en vaardigheidsgedrewe landbou-ekonomie in die Noordwes te bevorder. Deur datagedrewe beplanning te kombineer met jeugbemagtiging, hoop die departement om nuwe vlakke van produktiwiteit en innovasie in die sektor te ontsluit.

Boere word aangemoedig om die registrasieproses noukeurig te voltooi en seker te maak dat alle inligting akkuraat en op datum is. Die inligting wat verskaf word, sal streng vertroulik hanteer word en slegs vir beplannings- en ondersteuningsdoeleindes gebruik word.

Registrasie is eenvoudig en kan aanlyn voltooi word via die departement se amptelike webwerf: www.dard.nwpg.gov.za. Hierdie inisiatief is een van verskeie programme wat die Noordwes se landbousektor posisioneer vir inklusiewe, langtermyn groei gebaseer op samewerking, data en strategiese ontwikkeling van menslike kapitaal.

OFM Agri/Verklaring cg