Volgens Waldo du Preez het ’n ongewone storm vroeg Mei die streek getref met drie intensiewe haelvlae wat wydverspreide skade aangerig het.

“Toe ons die middag by die lande kom, het ons besef dis baie erger as wat ons gedink het,” sê Du Preez. “Die hael het drie van ons plase hard getref, en boere in ’n strook van omtrent vier kilometer breed is geraak.”

Hierdie skade het beteken dat daar eenvoudig geen oes is om meer te stroop nie. Die Stroperresies, wat sedert 2004 plaasvind en bekend is danksy sy landboutoerusting-demonstrasies en stroopkompetisies tussen plaaslike boere, is dus vir vanjaar gekanselleer. Die volgende resies word egter reeds vir 5 Junie 2026 beplan.

“Ons het besluit ons kan nie ophou met hierdie tradisie nie. Die belangstelling is ongelooflik – meer as 72 stalletjies het reeds ingeskryf vir vanjaar. Fabrikate het gevra dat ons asseblief alles gereed hou vir volgende jaar. Ons gaan definitief voort.”

Die program vir 2026 sal weer uit demonstrasies vroegoggend bestaan, gevolg deur stroperresies teen 14:00. Belangstellendes wat vanjaar nie kon deel wees nie, word aangemoedig om aan te sluit. “Ons is op Facebook en Instagram onder ‘Stroper Resies’. Daar’s nog plek en ons lyne is heel jaar oop – ons wil graag nuwe fabrikate en deelnemers verwelkom.”

Ondanks die teenspoed bly die boere positief. “Ons is weer lus om die planters uit te haal vir die nuwe seisoen.”

OFM Agri cg