Volgens die Suid-Afrikaanse Landboumasjinerievereniging is 635 trekkers in Mei verkoop – ’n toename van 12% teenoor die 566 eenhede wat in Mei 2024 verkoop is. Tot dusver in 2025 is trekkerverkope altesaam 2 926 eenhede, wat bykans 20% hoër is as die 2 449 eenhede teen dieselfde tyd verlede jaar.

Stroperverkope toon selfs groter groei. In Mei is 41 stropers verkoop, 16 meer as die 25 eenhede van verlede Mei – ’n jaar-tot-jaar styging van 64%. Jaar-tot-datum staan stroperverkope op 148 eenhede teenoor 103 verlede jaar, oftewel ’n toename van amper 44%.

Kommoditeitspryse is tans gunstig

Volgens die vereniging bly die sentiment in die mark positief. Boere is steeds besig met die oeswerk en opbrengste is oor die algemeen goed, alhoewel laat reën in sommige gebiede die gehalte van gewasse beïnvloed het. Kommoditeitspryse is tans gunstig en dra by tot boere se vertroue.

Daar is egter steeds boere wat wag om eers nuwe toerusting aan te skaf nadat hul oeste voltooi is en die finale opbrengs en gehalte bekend is. Volgens die huidige voorspellings behoort trekkerverkope vanjaar tussen 5 en 10% meer te wees as in 2024, met stroperverkope wat na verwagting ook die vorige jaar se syfers sal oortref.

OFM Agri cg