Dit volg ná twee afsonderlike voorvalle wat ondersoek is deur die provinsiale departement van landbou en landelike ontwikkeling.

Luidens die Noordwes departement van landbou is die eerste geval deur ’n privaat veearts opgemerk wat die departement gewaarsku het nadat hy verdagte simptome op ’n plaas gesien het. ’n Staatsveearts het toetse uitgevoer, waarvan monsters na die Onderstepoort Veterinêre Instituut gestuur is vir bevestiging.

’n Tweede geval is in Madibeng aan die lig gebring, waar tekens van infeksie eers op die slaglyn by ’n abattoir opgemerk is, nadat dit tydens die voor-slag-inspeksie gemis is. Toetse het bevestig dat beide SAT 2- en SAT 3-stamme van die virus teenwoordig is.

Dier- en produkbewegings is verbied

Die diere wat nog nie geslag is nie, is onder ’n Rooi Kruis-permit terugvervoer na die voerkraal in Ventersdorp waar hulle vandaan kom. Beide betrokke plase is onder kwarantyn geplaas, met alle dier- en produkbewegings verbied.

Kontakpunte van Gauteng se uitbreking wat met dié gevalle verbind word, word nou aktief gemonitor en getoets. Hierdie plase is ook uit voorsorg onder kwarantyn geplaas.

Bek-en-klouseer raak alle gesplete hoefdiere soos beeste, varke, skape, bokke en sekere wildspesies. Simptome sluit koors, mankheid en sere in die bek, op die hoewe en spene in.

Verdagte gevalle moet onmiddellik by die plaaslike staatsveearts aangemeld word. 

OFM Agri cg