Onder die finaliste tel Thian Heyns (29) van Clocolan in die Vrystaat, wat ’n gemengde boerdery met Sussex stoet- en kommersiële beeste, asook mielies, soja, sonneblom en koring bedryf. Sy benadering tot volhoubare produksie en presisieboerdery het hom laat uitstaan in die eerste beoordelingsronde.

Die Noord-Kaap word verteenwoordig deur Tiaan Barkhuizen (33) van Garies, wat kommersieel met boerbokke en skape boer en ook ’n Dorperstoet ontwikkel het. Sy aanpasbaarheid in ’n uitdagende klimaatsomgewing en sy genetiese verbeteringsprogramme het hom ’n plek tussen die top ses besorg.

Die kompetisie, wat vanjaar vir die 24ste agtereenvolgende jaar aangebied word, beklemtoon nie net boerderyvernuf nie, maar ook die leierskap, bestuursvaardighede en visie van jong produsente. Die beoordelingspan besoek elke finalis se plaas tussen 14 en 18 Julie 2025, waar kriteria soos tegniese kundigheid, finansiële bestuur en arbeidshantering geëvalueer sal word.

Benewens Heyns en Barkhuizen sluit die ander finaliste in:

• Niel Booyens (28) van Belfast, Mpumalanga, ’n gemengde boer met beeste, skape en graan.
• Martin van Jaarsveld (30) van Greylingstad, Mpumalanga.
• Willem van der Merwe (36) en Francois du Toit (34) van Chrissiesmeer, Mpumalanga, wat as vennote inskryf.
• Francois du Toit skryf ook individueel in met ’n fokus op saaiboerdery.

Die wenner word op 10 September tydens die TLU SA Kongres aangekondig. Pryse sluit onder meer ’n BYD-bakkie vir ’n jaar, R50 000 kontant van Manitou en bykomende kontantpryse van Santam vir die naaswenners in.

TLU SA sê die kompetisie dien as platform om die volgende geslag landbouleiers te inspireer – veral dié wat, soos Heyns en Barkhuizen, met visie en vasberadenheid in uitdagende omgewings boer.

OFM Agri cg