Agriculture
Agri SA waarsku oor Coida-wysigings─── ISABEL VAN TONDER 10:40 Fri, 06 Mar 2026
Agri SA waarsku sy lede moet dringend aandag skenk aan die implementering van wysigings aan die Wet op Vergoeding vir Beroepsbeserings en -siektes (Coida), wat belangrike implikasies vir werkgewers kan inhou.
Die organisasie sê verskeie bepalings van die wysigingswet (Wet 10 van 2022), wat die oorspronklike wet van 1993 wysig, is reeds in werking, terwyl ander bepalings binnekort geïmplementeer gaan word.
Die wysigings versterk hoofsaaklik die administrasie en afdwinging van die vergoedingstelsel, en brei die bevoegdhede van die vergoedingskommissaris uit. Vir landbouwerkgewers bly die kernverpligting onveranderd: alle werknemers, insluitend seisoenale en vastetermynplaaswerkers, moet by die vergoedingsfonds geregistreer en verklaar word.
Werkgewers moet jaarliks noukeurige opgawes van werknemers se verdienste indien, aanslae betaal, en beroepsbeserings of siektes binne die voorgeskrewe tydperke aanmeld. ’n Belangrike aspek van die wysigings is die beduidende verhoging van boetes en sanksies vir nie-nakoming.
Akkurate opgawes van werknemers moet jaarliks ingedien word. Foto: Pexel
Diegene wat versuim om werknemers te registreer, hul verdienste korrek te verklaar, of beserings aan te meld, kan aan hoër afdwingingsmaatreëls blootgestel word. Volgens AgriSA word die kommissaris se inspeksie- en invorderingsbevoegdhede ook versterk.
Die landbouorganisasie raai boere aan om te verseker hul registrasie by die vergoedingsfonds is op datum, alle kategorieë werknemers, insluitend seisoenale werkers, is korrek verklaar, en interne prosedures vir aanmelding van beserings en die byhou van ongeluksregisters word behoorlik bygehou.
Gegewe die arbeidsintensiewe aard van landbou en die versterkte afdwingingsraamwerk, is behoorlike administratiwe nakoming toenemend belangrik om regs- en finansiële risiko’s te beperk.
