Die landbouminister het die wysigings gemaak nadat die Suid-Afrikaanse Pluimveevereniging (Sapa) ingevolge die Wet op Dieresiektes ’n formele beswaar ingedien het.

Volgens die departement het Sapa kommer uitgespreek oor probleme binne die departement se dieregesondheiddirektoraat. Pluimveeprodusente word glo gedwing om op ’n verouderde stelsel staat te maak wat neerkom op die grootskaalse uitwissing van besmette en gesonde voëls.

John Steenhuisen het die bevindings van die Artikel 23-ondersoekkomitee bestudeer en besluit om die aanbevelings daarvan te in werking te stel.

Wegbeweeg van grootskaalse uitwissing

Die verslag bied ’n geleentheid om weg te beweeg van die tradisionele uitwissingbenadering, meen hy, wat die vernietiging van sowel gesonde as besmette voëls vereis het, en dit te vervang met ’n staatsbeheerde inentingstrategie.

“Ons pluimveeboere het direkte ondersteuning nodig en ons verander die beleid om hulle ’n wettige meganisme te gee om hul bestaansmiddele te beskerm. Die ou regulasies het die bedryf gedwing om troppe onnodig uit te skot, wat landbou-ondernemings benadeel en voedselpryse vir verbruikers verhoog het.”

‘Boere mag voortaan ’n kombinasie van inenting, biosekerheidsmaatreëls en 
toetsing gebruik wat … finansiële verliese beperk’

Die verandering bied produsente die wettige reg om geverifieerde wetenskaplike hulpmiddels te gebruik om hul boerdery en landbouwerkgeleenthede te beskerm en bekostigbare voedsel vir die publiek moontlik te maak, voeg hy by.

Die formalisering van ’n HPAI-inentingsraamwerk ingevolge die Wet op Dieresiektes sal die manier verander waarop pluimvee-ondernemings bestuur word. Boere mag voortaan ’n kombinasie van inenting, biosekerheidsmaatreëls en toetsing gebruik wat die behoefte aan grootskaalse uitwissing verminder en finansiële verliese beperk.

Die landboudepartement sal ook die regulasies op dieresiektes wysig of ’n formele Artikel 9-beheermaatreël uitreik om ’n duidelike regsraamwerk vir die bestuur van uitbrekings op plase te skep.

Die nuwe reëls wil siektebeheervereistes vir sowel kommersiële as kleinskaalse boere balanseer, terwyl die departement toesig sal hou oor nasionale moniteringstelsels, laboratoriumtoetse en nakoming tydens uitbrekings.

Steenhuisen het sy departement opdrag gegee om onmiddellik tussentydse beheermaatreëls in werking te stel terwyl die beleidsveranderinge deur die toepaslike statutêre prosesse gefinaliseer word.

OFM Agri sm

• Deel jou landbounuus: agri@ofm.co.za.