Die doel van hierdie vennootskap is om die bewyse wat beskikbaar is vir wetstoepassing, beleidmakers en die landbousektor te verbeter in die hantering van dié probleem.

“Landelike veiligheid is fundamenteel vir voedselsekerheid, ekonomiese groei en die volhoubaarheid van landbou,” sê Johann Kotzé, uitvoerende hoof van AgriSA. “Deur die bewysbasis te versterk en saam met ons vennote in besigheid en wetstoepassing te werk, kan ons meer ingeligte besluitneming ondersteun en bydra tot veiliger landelike gemeenskappe.”

Misdaad op die platteland strek verder as individuele boerderyondernemings. Foto: Pexel.com

Die vennootskap vestig ’n raamwerk vir die versameling, ontleding en verslagdoening van landelike misdaad-inligting gegrond op Bacsa se vlagskip E2-Plus-misdaadbestrydingsplatform. Deur die kundigheid en netwerke van georganiseerde landbou en die breër sakegemeenskap te kombineer, beoog AgriSA en Bacsa om die nasionale bewysgrondslag te verstewig wat nodig is om misdaad in landelike gebiede te hanteer.

Misdaad op die platteland strek verder as individuele boerdery-ondernemings. Dit bedreig voedselproduksie, voedselsekerheid, ondermyn beleggings, ontwrig landelike ekonomieë en beïnvloed die veiligheid en welstand van landelike gemeenskappe en hul voortbestaan. Die situasie vereis doeltreffende optrede wat op geloofwaardige, tydige en bewysgegronde inligting gegrond is.

Die vennootskap steun op wettige samewerking en bewysgegronde optrede. Foto: Pexel.com

Kragtens die ooreenkoms sal AgriSA en Bacsa/E2-Plus gesamentlik inligting insamel en landelike misdaadneigings ontleed en saam gesamentlike verslae, voorleggings en openbare verklarings opstel gegrond op geverifieerde bewyse en inligting.

Hulle sal deurgaans met die polisie skakel, asook met die Valke, die nasionale prioriteitskomitee vir landelike veiligheid en ander relevante instellings.

Anton du Plessis, uitvoerende hoof van Bacsa, sê: “Hierdie vennootskap versterk die samewerking tussen georganiseerde besigheid, georganiseerde landbou en wetstoepassing. Deur ons kundigheid en inligting te kombineer, kan ons die gehalte van landelike misdaad-inligting en landelike veiligheidsdata verbeter en gekoördineerde en effektiewe reaksies op misdaad ondersteun.”

Die vennootskap steun op wettige samewerking en bewysgegronde optrede. Alle inligtingsdeling sal voldoen aan die Wet op die Beskerming van Persoonlike Inligting en toepaslike wetlike vereistes.

OFM Agri/Isabel van Tonder sm

• Deel jou landbounuus: agri@ofm.co.za.