Hoofman Pitso (72) is in April 2020 na sy laaste rusplek geneem op die agterkant van ’n sleepwa, geklee in sy gunsteling wit pak, met albei sy hande vasgemaak aan die stuurwiel. Daarna het die begrafnisondernemers die 1990’s E500 Mercedes in die “graf” laat afsak, wat spesiaal met toerusting agt voet diep gegrawe is.

Die voormalige sakeman en getroude pa van ses kinders is toe met ’n amptelike godsdienstige seremonie begrawe in die familie-begraafplaas by hul huis in Suid-Afrika.

Hierdie hoë profiel politikus van die United Democratic Movement (UDM) het opslae gemaak met sy ongewone begrafnis, wat selfs gesorg het dat inwoners die inperkingsmaatreëls verbreek het om dit by te woon.

Sy dogter, Sefora Letswaka (49) het gesê:
“My pa was eens ’n welgestelde sakeman en het ’n vloot Mercedes-motors besit, maar later het dinge moeilik geraak en hy het dit verloor.

“Ongeveer twee jaar gelede het hy vir homself ’n tweedehandse Mercedes Benz gekoop. Dit het gou onklaar geraak, maar hy het steeds die meeste van sy tyd daarin buite die huis deurgebring.

“Hy kon dit nie meer ry nie, maar dit was waar hy gelukkig was en hy het altyd gesê dat hy eendag daarin begrawe wou word. Ons het na hom geluister en sy wens geëer, en ons hoop hy is gelukkig waar hy nou is.”

Die begrafnis het plaasgevind in Jozana-dorp, Sterkspruit, in die Oos-Kaap.

“Jy was selfs flambojant in die dood en ek is glad nie verbaas dat jy gevra het om in jou gunsteling Mercedes Benz na jou laaste rusplek geneem te word nie,” het UDM-leier Bantu Holomisa ná die begrafnis gesê.

Die voormalige eienaar van ’n supermarkketting was ’n gerespekteerde plaaslike hoofman en inwoners het in groot getalle opgedaag om te kyk hoe hy deur die strate na sy graf aangery word.

Hoofman Pitso het ineengestort en gesterf nadat hy uit sy huis gestap het op pad na sy betroubare Mercedes Benz, wat in die oprit geparkeer was. Dit was waar hy sou sit, na die motor se radio luister en net ontspan.

Lees ook: Weird Wide Web – Akwariumvis veroorsaak probleme vir meermin

Volgens familielede was hy nie siek nie, maar het eenvoudig weens ouderdom gesterf. Hy het uitdruklik aan sy oorlewende drie dogters en twee seuns gesê dat hy in sy motor begrawe wou word.

Thabiso Mantutle, direkteur van Phomolong Begrafnisdienste, het gesê: “Ons het nog nooit so ’n versoek gekry nie, en dit was ’n moeilike en stresvolle taak om uit te voer.

“Ons moes seker maak dat ons al die regte mates gehad het om die motor ten volle te begrawe, soortvan ’n afrit bou om dit in die graf te kry, en al die nodige papierwerk voltooi.

“Ons het al die amptelike toestemmings van die betrokke owerhede gehad om die begrafnis tot uitvoer te bring.”

Lees meer cg