’n Russiese amptenaar het een van die vreemdste kinderonderhoudsake van sy loopbaan onthul – ’n man wat sy hele identiteit jaarliks verander het om sy verantwoordelikhede te probeer ontduik.

Roman Korenef, hoof van die balju-diens in Tioemen, het aan die nuusplatform 72.RU vertel ’n plaaslike man het elke jaar sy volle naam – voornaam, van én patroniem (gevorm uit die vader se voornaam met ’n agtervoegsel wat “seun van” aandui) – verander in ’n poging om kinderonderhoud te vermy.

Volgens Korenef sou die man vir ’n ruk onder ’n nuwe identiteit leef, dan die volgende jaar weer sy oorspronklike naam aanneem, en die hele proses herhaal – asof sy skuldrekord só uitgewis sou word.

Maar die plan was van meet af gedoem.

“Wanneer mense hul naam verander, meld die registrasiekantoor dit outomaties aan by die balju’s,” verduidelik Korenef. “Daar is dus geen manier om kinderonderhoud op dié manier te ontduik nie.”

En dit is nie eens die vreemdste poging wat hulle al gesien het nie. Korenef sê sommige vaders gaan selfs nóg verder – soos om hul eie dood te versin, of ’n valse DNS-toets te voorsien – alles net om nie vir hul kinders te betaal nie.

 Die Tioemen-balju’s sê sulke vreemde verskonings is niks nuuts nie. In ’n ander geval het ’n man beweer hy ly aan ernstige agorafobie, ’n intense vrees vir situasies waar ontsnapping moeilik kan wees, om die balju’s uit sy huis te hou. Dit het egter geblyk hy besit twee woonstelle – en op een daarvan is reeds beslag gelê om skuld te betaal.

Lees meer cvs