Soos honderdduisende ander jong mense in Indië het die 20-jarige Suraj Bhaskar van Uttar Pradesh daarvan gedroom om ’n dokter te word. Ná twee mislukte pogings om die uitdagende National Eligibility cum Entrance Test te slaag, het sy droom begin vervaag – en volgens die polisie daartoe gelei dat hy ’n skokkende besluit geneem het.

Die polisie vermoed Suraj het doelbewus sy eie voet afgesit om ingevolge Indië se kwota vir gestremdes by ’n mediese kollege toegelaat te word. Die wet bepaal 5% van poste of plekke by staatsinstellings moet vir persone met gestremdhede gereserveer word.

Die geval het aan die lig gekom toe Suraj se broer die polisie ingelig het sy broer is glo aangeval en bewusteloos gevind – sonder sy voet. Ondersoekbeamptes het egter gou verskeie teenstrydighede in sy weergawe ontdek.

Lees ook: Weird Wide Web – Huurder verander woonstel in yskasteel

Tydens die ondersoek is ’n dagboek gevind waarin Suraj geskryf het: “Ek sal in 2026 ’n MBBS-dokter wees.” Sy meisie het ook bevestig dat hy obsessief was oor toelating tot mediese studies. Die polisie het voorts vasgestel hy het vroeër al sonder sukses probeer om dokumente te bekom wat bewys hy is gestremd.

Mediese verslae het verdere twyfel gewek. Die amputasie was skoon, wat daarop dui die voet is waarskynlik met ’n masjien verwyder en nie in ’n gewelddadige aanval nie. Spuite wat naby gevind is, dui daarop dat daar moontlik probeer is om die pyn te verdoof voor die amputasie.

Die polisie glo nou Suraj gee net voor hy is aangeval. Hy is na ’n trauma-sentrum oorgeplaas vir behandeling, maar sy voet is nog nie teruggevind nie.

Terwyl amptenare besluit watter regsoptrede oorweeg moet word, verkeer die land steeds in skok. Die voorval laat die kollig val op die intense druk waaronder jong mense verkeer om akademiese sukses te behaal, maak nie saak teen watter prys nie.

Lees meer