Moderne hommeltuie is indrukwekkend, maar ’n Moskou-gebaseerde maatskappy glo die toekoms van lugtegnologie het dalk vere. Die firma Neiry meen duiwe kan tradisionele hommeltuie oortref danksy hul uithouvermoë, die vermoë om in moeilike weerstoestande te vlieg, en hul talent om afgeleë plekke te bereik. 

Geen batterye word benodig nie – net ’n bietjie voëlkos. 

Maar hoe beheer jy ’n duif? Volgens Neiry: met ’n breininplanting.

Die stelsel behels klein elektrodes wat in die voël se brein geplaas word en aan ’n stimulator op sy kop gekoppel is. Voeg daarby ’n sonkrag-“rugsak” met elektronika en ’n borskamera, en jy het ’n sogenaamde “bio-drone”.

Die beheerder stuur ’n voorafbepaalde roete, terwyl elektriese impulse die voël links of regs laat draai. GPS help met navigasie, soortgelyk aan gewone hommeltuie. 

Neiry beweer ook geen voorafopleiding is nodig nie – ná die prosedure is die duiwe glo “radiobeheerbaar”.

Hierdie kuborgduiwe is nog nie kommersieel beskikbaar nie, maar die maatskappy sê hulle kan met onbemande vliegtuie meeding wat koste betref. Boonop kan ’n duif glo tot 480 km per dag vlieg sonder om te “herlaai”.

LEES OOK: Feel Good Friday – Regte seekat omhels robotspioen

Duiwe is dalk net die begin. Stigter Alexander Panov sê ander voëls kan ook gebruik word – kraaie vir kusmonitering, seemeeue vir strandgebiede, en selfs albatrosse vir groot oseaanstreke.

Moontlike toepassings sluit infrastruktuurinspeksies, industriële monitering en selfs reddingsoperasies in. Tog waarsku kenners dat die tegnologie ook vir toesig gebruik kan word – as dit werk soos belowe.

Vir nou bly dit egter ’n eksperimentele projek – en totdat dit regtig vlerke kry, hou ons maar ’n oop gemoed. Een ding is seker: die term “posduif” kan binnekort ’n heel nuwe betekenis hê.

Lees meer mvh