Stel jou voor jy slaap rustig wanneer jy skielik wakker skrik van iemand wat luidkeels die hele buurt uitskel. Nie ’n nagmerrie nie – net jou buurvrou met ’n megafoon. 

Dit is presies wat dosyne inwoners van Kaohsiung, Taiwan, vir byna twee jaar moes verduur. ’n Plaaslike hof het onlangs uitspraak gelewer teen ’n vrou met die van Chen, wat klankversterkende toerusting op haar balkon geïnstalleer het en dit gebruik het om bure laatnag uit te skel – glo minstens drie keer per week.

Die “uitsendings” het in Mei 2023 begin. Met ’n megafoon op maksimum volume het Chen haar frustrasies op sekere bure gerig met wie sy geskille gehad het. 

Ongelukkig het die res van die buurt ook ongewild deel geword van haar laatnag-program. Elke sessie het etlike minute geduur – lank genoeg om seker te maak niemand slaap rustig nie. 

Lees ook: Weird Wide Web – Tree opsy Powerslap; Run Nation-kampioenskap is hier

Na byna twee jaar van slaaptekorte en mislukte pogings om die saak vreedsaam op te los, het dosyne inwoners ’n gesamentlike klag by die polisie ingedien. Die saak het uiteindelik in die hof beland.

Chen het erken dat sy ’n megafoon gebruik het om bure uit te skel, maar beweer dit was nie gereeld nie en dat sy bloot gereageer het op geraas wat haar eie rus versteur het.

Die regter het egter bevind dat herhaalde, versterkte beledigings in die middel van die nag ver buite die perke van wat die samelewing as redelik of aanvaarbaar beskou. 

Sy is tot drie maande tronkstraf gevonnis, wat met ’n boete van NT$90 000 vervang kan word. Sy kan ook teen die vonnis appelleer.

Lees ook: Weird Wide Web – Rotsklim word in Taiwan as ‘skoolvak’ aangebied

Hoe vreemd dit ook al klink, is dit nie die eerste geval van “klank-oorlogvoering” tussen bure nie. 

Daar was al voorheen berigte van mense wat harde musiek, aanhoudende geblaf of selfs opera vir jare lank op volle volume gespeel het.

Les van die storie? As jy iets vir jou bure wil sê … begin met ’n WhatsApp-boodskap.

Lees meer