Die meeste mense hou foto’s, pootafdrukke of dalk ’n halsband as herinnering aan ’n geliefde troeteldier. Maar ’n permanentegrimering-kunstenaar in die Verenigde Koninkryk het besluit om dit ’n stap verder te neem. 

Nadat haar hond Patch, wat 20 jaar lank haar getroue maat was, dood is, was Claire Hobson nie gereed om totsiens te sê nie.

Toe sy voorberei het om oorsee te verhuis, het sy nie daarvan gehou om sy as sommer net in ’n tas saam te neem nie.

Sy kry toe ’n baie ongewone idee. Claire het ’n kosmetiese tatoeëerkunstenaar gevra om ’n klein hoeveelheid van Patch se as met die ink van haar semi-permanente oogomlyner-tatoeëermerk te meng. Haar gedagte was dat Patch steeds die wêreld “deur haar oë” sou kon sien.

Selfs Claire erken dat die idee ’n bietjie vreemd klink, maar ’n mede-grimeerkunstenaar het ingestem om haar te help. ’n Klein hoeveelheid van die as is met die tatoeëerink gemeng en as deel van haar oogomlyner aangebring.  Vir Claire het dit nie gegaan oor skokwaarde of aandag trek nie.

Dit was bloot haar manier om ’n deel van haar geliefde hond altyd naby haar te hou. Sy sê honde gee ’n vorm van onvoorwaardelike liefde wat moeilik is om te vervang, en ná 20 jaar saam wou sy ’n spesiale manier vind om hom te onthou. Die oogomlyner-tatoeëermerk sal mettertyd vervaag, maar Claire sê sy het nog van Patch se as oor indien sy eendag weer ’n opknapping nodig het.

Dus, terwyl die meeste mense hul herinneringe in ’n fotoalbum bêre … dra Claire hare elke dag saam met haar.

Lees meer