’n Behandeling genaamd Axhidrox sal na verwagting binne die komende maande beskikbaar word vir duisende pasiënte in Brittanje se openbare gesondheidsdiens (National Health Service) wat aan oormatige okselsweet ly en reeds ander behandelings probeer het.  Die room bevat ’n middel, glikopirroniumbromied, wat die senuwee-seine blokkeer wat die sweetkliere aansê om sweet te produseer.

En die resultate is nogal indrukwekkend.  In kliniese proewe met 518 mense het gereelde gebruik van Axhidrox sweet ná 12 weke met gemiddeld 65% verminder.  Sowat een uit elke drie deelnemers het ’n vermindering van minstens 75% ervaar, terwyl ongeveer een uit elke vyf mense se sweet met ’n ongelooflike 90% afgeneem het.

Die voordele is glo vir ongeveer ’n jaar lank gehandhaaf.  Die toestand wat behandel word, staan as hiperhidrose bekend, en daar word beraam dat ongeveer 2,8 miljoen mense in Brittanje daaraan ly.  

Mense met hiperhidrose kan oormatig sweet selfs wanneer hulle nie warm kry, oefen of besonder gespanne voel nie. Die toestand word moontlik veroorsaak deur foutiewe senuwee-seine tussen die brein en sweetkliere, en genetika kan volgens navorsers ’n rol speel in tot die helfte van gevalle.

Lees ook: Weird Wide Web – Tatoeëer sonder die pyn: Is dit moontlik?

En dit is beslis nie net ’n kosmetiese irritasie nie.  Sowat driekwart van mense met hiperhidrose sê glo dat dit hul lewensgehalte negatief beïnvloed. Hulle is ook aansienlik meer geneig om angs en depressie te ervaar. Daar bestaan reeds behandelings, waaronder sterk antiperspirant, Botox-inspuitings en sekere medikasie.

Maar Axhidrox werk op ’n ander manier.  Pleks daarvan om die sweetkliere fisiek toe te stop, beïnvloed dit die senuwee-seine wat vir die kliere sê om te begin sweet.

Met ander woorde, dit vertel jou oksels: “Dankie, maar ek dink ons het vandag genoeg water.”

Die room is reeds privaat beskikbaar deur aanlyn apteke in Brittanje teen ongeveer £130 – sowat R3 000.  Maar dit is nie heeltemal sonder moontlike newe-effekte nie. Dit kan velreaksies, ’n droë mond of oë, hardlywigheid en versteurde visie veroorsaak.

Die vervaardiger waarsku gebruikers ook om die room weg van die oë, mond en neus te hou en om onmiddellik op te hou indien simptome ontwikkel soos swelling van die gesig, asemhalingsprobleme, jeuk of ’n uitslag, aangesien dit tekens van ’n ernstige allergiese reaksie kan wees.

Lees ook: 40 dankies vir 40 jaar van OFM: Childline Free State sê dankie aan toegewyde pleegouers

Intussen probeer wetenskaplikes ook uitpluis waarom sommige mense soveel meer sweet as ander.  Navorsers by Johns Hopkins-universiteit het onlangs ’n genetiese mutasie geïdentifiseer wat moontlik vir ongeveer een uit elke vyf gevalle van hiperhidrose verantwoordelik kan wees.  

Volgens die navorsers verhoog die mutasie blykbaar die senuwee-seine wat sweet stimuleer – wat moontlik vir toekomstige behandelings ’n baie spesifieke teiken bied.

Dus, vir almal wie se kieliebakke soms lyk asof hulle hul eie onafhanklike weerstelsel het… dalk is verligting uiteindelik op pad!

Lees meer cvs