Jy weet dinge het ’n vreemde wending geneem wanneer ’n paar pensioentrekkers besluit om teen ’n verkeersligpaal op te klim en drade begin knip.  Dit is presies wat in Ilfracombe, Devon, in Engeland gebeur het, waar ’n man en vrou in hul 60’s en 70’s afgeneem is waar hulle glo aan verkeersligte en hul sensors peuter.

En blykbaar was hulle nie net sommer kwaad vir die verkeer nie.  Hulle is deel van ’n groep wat bekend staan as die Blade Runners – ’n beweging wat deur verskeie samesweringsteorieë gedryf word en wat verkeers- en moniteringstegnologie in dele van Brittanje teiken.

Maar hier raak die storie nóg vreemder.  Die Blade Runners teiken ook ULEZ-kameras – dit is die kameras wat in Londen se Ultra Low Emission Zone gebruik word om voertuigregistrasienommers te lees en voertuie te identifiseer wat nie aan die gebied se emissiestandaarde voldoen nie.

Daar is al verskeie berigte oor Blade Runners wat hierdie kameras se drade knip, die kameras van hul pale afhaal en dit beskadig of vernietig. In 2025 het aanklaers gesê daar was gedurende een bepaalde tydperk ongeveer 700 voorvalle van skade aan ULEZ-kameras, met skade van meer as £920 000 – oftewel sowat R21 miljoen.

Lees ook: Weird Wide Web – Nigeriese komediant probeer huil tot in rekordboeke

In een besonder vreemde voorval is ’n beskadigde ULEZ-kamera in Bexleyheath selfs met ’n Kersboom vervang. Maar in Devon is die Blade Runners se teikens nie net ULEZ-kameras nie. Hulle het ook verkeersligte en verkeersbeheertoerusting geteiken.

Die mense wat in Ilfracombe afgeneem is waar hulle drade knip, was glo deel van dieselfde samesweringsgroep. In plasings aanlyn beweer hulle dat moderne verkeerstegnologie eintlik ’n soort “elektroniese aanvalswapen” is wat van sogenaamde onwettige slagveldtegnologie afkomstig is.

Hulle beweer ook hierdie tegnologie kan ernstige gesondheidsprobleme veroorsaak – onder meer hartaanvalle, breinkanker, angs en selfs skielike dood.  Daar is egter geen bewyse wat hierdie bewerings ondersteun nie.

Volgens Devon and Cornwall Police het die voorval in Ilfracombe duisende ponde se skade veroorsaak, en die twee mense is in hegtenis geneem oor die skade veroorsaak en dat hulle padgebruikers in gevaar gestel het. Hulle is later op borgtog vrygelaat. En dit gaan nie net daaroor dat ’n arme verkeerslig nou ’n paar minder drade het nie.

In Londen was daar al gevalle waar verkeersligte én ULEZ-kameras op dieselfde tyd beskadig is. In een voorval in Orpington het die polisie skade aan verskeie stelle verkeersligte en ’n ULEZ-kamera ondersoek nadat ’n ongeluk plaasgevind het waarin ’n sesjarige meisie beseer is.

So, blykbaar is daar nou ’n groep mense wat oorlog verklaar het teen verkeerstegnologie, een draadsnyer op ’n slag.

Lees meer sm