Mike het probeer om sy YouTube-kanaal vir videospeletjies, Mighty Mike Plays, te laat groei. Sy pa, Dave, het vir hom gewys hoe om ’n klein YouTube-advertensieveldtog te loods. Die begroting? $20. Pa het verduidelik hoe om 'n begroting op te stel, ’n teikengehoor te kies en ’n video te bevorder.

Die seun se belangrikste gevolgtrekking was meer geld beteken meer kykers en toe begin hy sy eie veldtogte skep. Daar was net een klein probleempie: Pa se maatskappykredietkaart was op die Google-rekening gestoor.

Drie weke later is Dave ontbied vir ’n vergadering met sy bestuurder, maatskappyverteenwoordigers en die finansiële afdeling. Hulle het die rekening aan hom gewys: $118 000 (sowat R2 miljoen) is bestee aan die bevordering van video’s waarin Mighty Mike, Roblox en Minecraft verskyn het.

Sommige van die video’s is meer as 200 000 keer gekyk. Dit is indrukwekkend totdat jy besef dit het die pa sowat R10 vir elkeen gekos wat dit gekyk het. Dave sê Mike het nie die erns van sy optrede besef nie en hy het die hele situasie redelik goed hanteer.

Sy reaksie? “Ek is beslis in die moeilikheid.” Regtig, Mike jou pa se kredietkaart was beslis ook in die moeilikheid.

Die gesin sê hulle verwyder nou gestoorde betaalbesonderhede, stel bestedingsperke in en aktiveer ouerkontroles. Daar is egter een baie belangrike waarskuwing hier: die bedrag van $118 000 en die maatskappy se reaksie is nie onafhanklik geverifieer nie. Die les vir elke ouer met ’n kind wat videospeletjies speel is: Maak altyd seker watter bankkaart is gekoppel voordat jy vir jou kind sê om enige video’s te bevorder. 

Lees meer dg