Ons weet almal dat kommunikasie belangrik is in ’n verhouding. Maar een Chinese programmeerder het die idee van “altyd daar wees vir jou geliefde” na ’n heel nuwe vlak geneem – deur ’n KI-kletsbot te bou wat namens hom boodskappe stuur.

Li Kaixiang, ’n sagteware-ontwikkelingsingenieur by die Chinese internetreus JD.com, het glo ’n romantiese probleem gehad. Hy was so besig by die werk dat hy gesukkel het om op sy meisie se daaglikse boodskappe te reageer. Maar hy wou ook nie hê sy moes voel dat hy haar ignoreer nie.

Sy oplossing? Bou ’n kletsbot wat 24 uur per dag haar boodskappe kon beantwoord en voorgee dat dit hy is. En volgens skermgrepe wat hy op China se sosialemediaplatform Weibo gedeel het, het dié digitale kêrel verbasend goed gevaar. Op sy heel eerste dag het die kletsbot glo sowat 300 boodskappe met sy meisie uitgeruil. Driehonderd! Dis nie meer ’n gesprek nie – dis amper ’n heeltydse betrekking!

In sommige van die gesprekke het Li se meisie blykbaar begin vermoed dat iets nie pluis is nie. Sy het vrae gevra soos: “Hoe doen jy dit?” en “Hoekom antwoord jy so vinnig?” Maar die kletsbot het dit glo reggekry om haar agterdog te ontduik. Of sy geweet het dat sy eintlik met ’n outomatiese weergawe van haar kêrel gesels, is nooit duidelik gemaak nie.

Die internet was egter gaande oor die idee. Sommige mense het Li ’n genie genoem, terwyl ander sommer dadelik gevra het of hy nie die program se bronkode kan deel nie. Een gebruiker het selfs gesê dit sal hom help om te voorkom dat sy meisie kwaad word wanneer hy nie op haar boodskappe reageer nie.  Maar die KI-kêrel was nie heeltemal foutloos nie. In een boodskap het dit glo geskryf: “Skat, vandag is die 618de dag wat ons saam is. Mag jou bui helderder as die son wees.”

Totdat dit voortgaan met ’n volledige weerverslag, insluitend temperature tussen 18 en 34 grade Celsius, windspoed en ’n luggehalte-lesing. Niks sê ek is lief vir jou soos ’n romantiese boodskap wat opgevolg word deur die dag se weervoorspelling nie!

Lees ook: Weird Wide Web – Man laat trousertifikaat op sy arm tatoeëer

Natuurlik was nie almal beïndruk nie. Sommige mense het gewonder hoe Li genoeg tyd gehad het om ’n volledige kletsbot te bou, maar skynbaar nie genoeg tyd gehad het om self ’n vinnige boodskap aan sy meisie te stuur nie.  Ander het hom gewaarsku dat daar ’n veel groter gevaar is: Wat as sy meisie eendag op die kletsbot verlief raak?

En net toe die storie viraal gaan, het Li sy Weibo-rekening uitgevee. Of hy skaam was oor al die aandag en of hy bekommerd was dat sy meisie sy digitale geheim sou ontdek, weet niemand nie. Een ding is seker: Tegnologie kan ons deesdae met omtrent alles help, maar dalk is liefde een gesprek wat ons steeds self moet voer.

Lees ook: Weird Wide Web: Amerikaner dagvaar ouers oor te min liefde

Want as jou meisie vra of jy haar mis, is die laaste ding wat jy wil hê ’n outomatiese antwoord wat sê: Jou huidige ligging is 18 grade, met ’n 40%-kans op romanse.

Die les? As jy te besig is om jou meisie te antwoord, moenie ’n robotkêrel bou nie. Jy kan dalk net jou eie kompetisie skep!

Lees meer sm