Die voorval het na bewering op Saterdag 25 Maart plaasgevind, waarna die verdagte op Dinsdag 28 Maart in hegtenis geneem is.

Tshepo Nxumalo (20) het Woensdag in die landdroshof in Standerton verskyn op twee aanklagte van verkragting sowel as vir aanranding. Hy bly in aanhouding totdat hy op 13 April aansoek doen vir borgtog.

Polisiewoordvoerder Selvy Mohlala sê die slagoffer en die beskuldigde het mekaar via Facebook ontmoet, waarna hulle afgespreek het om langs 'n berg in Standerton te ontmoet.

“Die slagoffer het glo saam met haar eenjarige kind gegaan. Met sy aankoms het die verdagte glo die tienermeisie oortuig dat hy haar broer op die bergtop moet gaan haal. Hulle het almal saam gegaan en met hul aankoms word beweer dat hy haar voor haar kind verkrag het terwyl hy 'n video met sy selfoon opgeneem het.

“Die meisie is na bewering vir die tweede keer deur die man verkrag voordat hy gedreig het om die opnames wat hy gemaak het via sosiale media-platforms te versprei, sou sy besluit om die voorval aan te meld.

“Daarna het die verdagte van die toneel gevlug en die saak is uiteindelik by die polisie in Standerton aangemeld,” sê Mohlala.

“Die eenheid vir gesinsgeweld, kinderbeskerming en seksuele misdrywe in Standerton het ondersoek ingestel en hul harde werk het gou vrugte afgewerp toe hulle die verdagte in ’n hoek vasgekeer het nadat hulle hom in Standerton opgemerk het.”

Die polisie moedig ouers aan om hul kinders se gebruik van sosiale media-platforms te monitor om soortgelyke voorvalle hok te slaan.

OFM-nuus