'n Stroperis skuldig bevind aan verskeie aanklagte, onder meer betreding van ’n nasionale park, renosterstropery, sameswering om ’n misdaad te pleeg en besit van ’n byl, vuurwapen en ammunisie.

Pretoriuskop-veldbewaarders het op 21 Junie 2016 tydens patrollie afgekom op ’n pas-doodgemaakte renoster, waarvan die horings verwyder is. Hulle het dadelik begin spoorsny en het drie verdagtes insluitend Mbongeni Selephi Ngobeni gevind. 

Een van die verdagtes het in ’n dam ingehardloop en is deur krokodille opgevreet, terwyl ’n ander daarin geslaag om te ontsnap.

Die staat kon deur middel van DNS-toetse bo redelike twyfel bewys dat die horings wat by die beskuldigde gevind is, dié van die gestroopte renoster is. Die staat het verder bewys dat die koeël waarmee die renoster doodgeskiet is, deur dieselfde geweer gevuur is as wat in Ngobeni se besit gevind is.

Ngobeni is tot 17 jaar direkte gevangenisstraf gevonnis en is ook onbekwaam verklaar om ’n vuurwapen te besit.

OFM Nuus