Die Verkiesingskommissie van Suid-Afrika (OVK) het gesê elke bekommernis of beswaar wat in terme van die verkiesingsproses geopper word, sal oorweeg word, en indien nodig sal stemme hertel word.

Die OVK het Saterdagmiddag ’n media-inligtingsessie gehou ná besware van sekere partye, met sommige wat gesê het dat hulle die verkiesingsuitslag sal verwerp as daar nie 'n hertelling is nie.

Die OVK sê hy sal opdrag gee dat stemme in spesifieke gebiede hertel word, sou daar bewyse wees dat dit vereis word.

Mosotho Moepya, OVK-voorsitter, het aan die media by die OVK se nasionale uitslagsentrum gesê die kommissie sal verseker dat hy elke bekommernis hanteer wat deur deelnemers geopper word deur middel van sy beswaarproses, wat tot 18:00 Saterdagaand verleng is.

’n Aantal partye het besware geopper, insluitend MK Party, die EFF, Rise Mzansi, die ACDP en die ACT.

So ’n verlenging word ingevolge die Kieswet toegelaat deur aansoek te doen vir ’n toegewing met betrekking tot besware wat ná die voorgeskrewe sperdatum ingedien word. In hierdie geval het deelnemers tot Vrydag om 21:00 gehad om hul klagtes in te dien.

Moepya sê die kommissie is nie te tegnies in sy benadering nie.

“In hierdie proses is die houding van die kommissie nie om vorm bo substansie te plaas nie. Ons gaan nie te tegnies wees nie. Ons gaan kyk na die kwessies wat voor ons gebring is en ons gaan dit oorweeg in die lig van die versekering van die integriteit van hierdie verkiesings. Waar die kommissie wesenlikheid vind deur die resultateproses, sal dit toepaslike oplossings beveel wat in sommige gevalle die hertelling in spesifieke gebiede kan insluit.”

OFM Nuus cg