Die polisie se Anti-Ontvoeringstaakspan het dié week Mauro Mucambe Junior, die vermeende 40-jarige en gevreesde ontvoeringsleier van Mosambiek, tydens ’n dramatiese operasie by ’n residensiële kompleks in Fourways, Johannesburg, opgespoor.

’n Skietgeveg het uitgebreek en Mucambe is doodgeskiet. Twee vermeende medepligtiges is voor die voorval in hegtenis geneem en bly in aanhouding. 

Die operasie was deel van ’n poging om ’n Pakistanse sakeman op te spoor wat in Pretoria-Wes ontvoer is. Polisie het bevestig dat die slagoffer steeds aangehou word en dat die ontvoerders ’n losprys van sy familie geëis het.

Ná aanvanklike leidrade het die taakspan die verdagtes in ’n kompleks in Carlswald, Midrand, opgespoor. Daar het hulle ’n Mercedes-Benz en ’n silwer Pajero gekry en twee vermeende ontvoerders in hegtenis geneem.

Die ondersoek het hulle toe na Fourways geneem, waar hulle hul teenwoordigheid aangekondig het voordat die skietgeveg uitgebreek het.

Polisie het later die oorledene as Mauro Mucambe Junior geïdentifiseer. ’n Lasbrief vir sy inhegtenisneming is in Augustus 2024 deur die Maputo-polisie uitgereik.

Volgens SAPD-woordvoerder Athlenda Mathe is ’n ongelisensieerde vuurwapen, wat glo deur Mucambe gebruik is, sowel as tien patrone, vier selfone en vier bankkaarte op die toneel gevind.

Mathe het bevestig dat die polisie volkome vertroue het in die Anti-Ontvoerings Taakspan. “Ons bly ten volle toegewyd daartoe om die ontvoerde Pakistanse sakeman te red en alle oortreders voor die gereg te bring.”

OFM Nuus cg