Die European Outdoor Conservation Association (Eoca) ken geld toe vir belangrike bewaringsprojekte. Een van die kriteria is genoeg stemme moet uit die gemeenskap ontvang word om die aansoek te kan goedkeur.

Indien die EWT se aansoek slaag, sal die projekgeld gebruik word om jong mense as natuurbewaarders in die westelike Soutpansbergreeks aan te stel, riviere en bosse te rehabiliteer en ’n voetslaangids te ontwikkel om verantwoordelike ekotoerisme in die streek te bevorder. Die Soutpansberg is een van Suid-Afrika se biodiversiteitsbrandpunte en word toenemend bedreig deur habitatverlies en onvolhoubare grondgebruik.

Stemming vir die Eoca-fonds is oop van Maandag (20/10) tot volgende Vrydag, en die EWT doen ’n beroep op Suid-Afrikaners om hul stem uit te bring en so te help om die finansiering te verseker. 

“Elke stem tel,” sê die organisasie in ’n verklaring. Hy spoor ondersteuners aan om die veldtog met vriende en familie te deel.

Die voorgestelde projek kombineer ekologiese herstel met gemeenskapsontwikkeling, en skep werksgeleenthede terwyl jong mense bemagtig word om hul natuurlike erfenis te beskerm. 

Hupstoot vir bewaring

Die stappersgids sal dien as ’n opvoedkundige hulpmiddel én praktiese gids vir besoekers, sodat toerisme eerder tot bewaring bydra as om dit te ondermyn.

Die Eoca-fonds sal ’n tydige hupstoot gee aan plaaslike bewaringspogings, veral te midde van klimaatsdruk en ontwikkelingsbedreigings.

Ondersteuners kan via die Eoca-webwerf stem. Vir meer inligting, besoek die EWT op sosiale media.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM Nuus mvh