Hierdie intieme program van altviool en klavier verweef drie diep ekspressiewe werke: Sjostakowitsj se finale komposisie, die Altvioolsonate, geselekteerde liedere uit Schubert se Winterreise en uittreksels uit Prokofiev se Romeo en Juliet. Altviolis Jeanne-Louise Moolman en haar man, klavierspeler Piet Moolman, sluit by Yolanda Maartens aan in die OFM Kunsteklop om te gesels oor die uitvoering wat die 28ste Augustus plaasvind by die Odeion in Bloemfontein. 

Sjostakowitsj se Altvioolsonate (Op. 147) is 'n letterlike en metaforiese reis – in die geheue, in die self, en uiteindelik in die onbekende.

Schubert se Winterreise is die argetipiese musikale reis – 'n sielkundige en emosionele dwaal deur hartseer, verlies en illusie.

Prokofiev se Romeo en Juliet (Uittreksels): die ballet volg 'n dramatiese emosionele en narratiewe boog: onskuld - liefde - konflik - dood. Dis 'n reis van passie en tragedie.

Jeanne-Louise Moolman is die altviolis van die Odeion Strykkwartet aan die Universiteit van die Vrystaat in Bloemfontein, Suid-Afrika. Sy het aan die Universiteit van Pretoria in Suid-Afrika gestudeer. Sy het haar meestersgraad aan die UV met onderskeiding verwerf.

Piet Moolman is 'n musiekonderwyser by Oranje Meisies Sekondêre Skool, nadat hy BMus (Hons) en MMus grade aan die Universiteit van Pretoria verwerf het onder die mentorskap van professore Joseph Stanford en Ella Fourie.

As pianis het Piet 'n altviool- en klavierduo saam met sy vrou, Jeanne-Louise Moolman, gevorm en uitgebreid in stede soos Pretoria, Johannesburg en Bloemfontein, asook in Zimbabwe (Harare en Bulawayo), opgetree. In 1994 het die bekende komponis Stefans Grové sy Sonate vir Altviool en Klavier aan die duo opgedra. Hul uitvoering is deur Pretoria News as een van die jaar se musikale hoogtepunte erken.

Jeanne-Louise en Piet Moolman maak al 39 jaar lank saam musiek!

Kaartjies is beskikbaar by Quicket. 

OFM