Vuyiswa Leeuw (29), die ma van die vermoorde Katleho Leeuw (3), bly in aanhouding nadat sy verlede Donderdag vlugtig in die plaaslike landdroshof verskyn het. Die verrigtinge is uitgestel omdat dit as ’n hoëprofielsaak beskou word weens die groot openbare belangstelling en mediadekking.

Tydens Leeuw se verskyning het sy met ’n kombersie probeer om haar vyf maande swangerskap weg te steek. Sy word aangekla van die ontvoering en moord op Onkarabetse Leeuw (5), haar niggie se seuntjie.

Onkarabetse is op Donderdag 20 November in Glen begrawe, langs sy niggie Katleho, wie se liggaam in Oktober gevind is nadat sy seksueel aangerand en vermoor is.

Onkarabetse se ma, Rethabile (20), ’n niggie van Leeuw, het haar seuntjie op Saterdag 8 November as vermis aangemeld by die polisiekantoor in Glen. Ná ’n uitgebreide soektog in digte bosse is sy liggaam vier dae later gevind onder ’n kartonboks aan die suidelike buitewyke van die nedersetting.

Katleho is op Donderdag 23 Oktober as vermis aangemeld, maar haar liggaam is twee dae later in digte bosse naby die nedersetting gevind. Onkarabetse se pa is in die Vrystaatse psigiatriese hospitaal opgeneem vir maande lange sielkundige waarneming in die aanloop tot sy derde hofverskyning op Donderdag. 

Die landdros het tydens ’n vorige verskyning daarop gewys dat hy, volgens sy huisarts se oordeel, nie geestesgesond is nie. Daarom is die media se versoek om foto’s te neem van die hand gewys in afwagting van die 30 dae lange evaluering. 

“Dit verbaas my dat twee kinders, wat verwant is, onder soortgelyke omstandighede gesterf het,” het MaQueen Letsoha-Mathae, Vrystaatse premier, voorheen gesê. “Dis selfs erger dat twee familielede van die slagoffers in hegtenis geneem is en van hul moord aangekla word.” 

Ongeag wat mense ook al deurmaak, sê sy, kan dit nooit goedgepraat word om die reg in eie hande te neem nie.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM News/Zenande Mpame mvh