Lynette Brummer (64), Anna Fourie (73), Mapaseka Majorobella (35), Nomsa Ngcongwane (55), Ntswaki Mofolo (30) en Puseletso Moloi (33), almal voormalige werknemers van die Silver Village-versorgingsoord, het Dinsdag (8/12) in die streekhof op Welkom voorgekom.

Hulle staan tereg op aanklagte van poging tot moord, ontvoering, aanranding met die opset om ernstig te beseer op Bettie Payne en die oortreding van art. 13 van die Wet op Ouer Persone.

Al ses het in die hof bevestig hulle sal van private regsverteenwoordiging gebruik maak. Die hof het hulle meegedeel dat die aanklagtes ernstig is. Elke oortreding kan lei tot ’n vonnis van tot 15 jaar as hulle skuldig bevind word.

Bettie Payne en haar dogter Mariana. Foto verskaf

Die beskuldigdes se regspan het die hof ook gevra om die neem van foto’s tydens die verrigtinge te verbied. Die hof het die aansoek afgekeur.

Die landdros het verduidelik selfs hoër howe laat foto’s onder soortgelyke omstandighede toe; daarom is daar geen regsgrondslag om dit in dié saak te verbied nie.

Buite die hof het die slagoffer se dogter, Mariana, aan OFM Nuus  gesê hoewel die vertragings frustrerend is, verwag sy ’n lang proses. “Ek wil net hê geregtigheid moet geskied.”

Brummer, wat ’n senior pos in die oord beklee het en ’n aandeelhouer was, word as die hoofbeskuldigde beskou, volgens getuienis van ao. Anja Tait, ondersoekbeampte, tydens ’n vroeëre verskyning.

Bettie Payne se hande. Foto verskaf

Brummer is op borgtog van R5 000 vrygelaat onder streng voorwaardes: Sy moet minstens 100 m van die instelling af wegbly en moes haar paspoort binne ses uur ná haar vrylating inhandig. Die oorblywende vyf beskuldigdes is elk vrygelaat op R1 000 borgtog.

’n Bron, wat anoniem met OFM Nuus tydens ’n vorige verskyning gepraat het, sê minstens 40 video-opnames vorm deel van die bewyse.

“Een opname, wat vermoedelik die beweerde aanranding vasvang, word as kritiek beskou. Dit wys glo hoe Brummer pille in Payne se mond forseer, in haar gesig blaas, haar neus toeknyp en op haar spoeg nadat sy medikasie geweier het. Toe Payne geskree het, het Brummer na bewering met kleefband teruggekeer en dit om haar mond en kop gedraai.”

Bettie Payne se mond was stukkend en opgeswel. Foto verskaf

Tait het getuig die video is opgeneem deur ’n opsigtelik kamera in die kamer, waarvan personeel bewus was. Die beeldmateriaal is aan ondersoekbeamptes oorhandig.

Fourie, Majorobella, Ngcongwane, Mofolo en Moloi word ook by die optrede betrek. Fourie het na bewering die kamer met ’n foon binnegekom terwyl Payne om hulp geskree het, en twee personeellede het na bewering staan en toekyk.

Brummer word ook daarvan beskuldig sy het Payne met ’n kombers toegemaak, vir haar gesê niemand sou haar hoor nie, die ligte afgeskakel en die kamer verlaat.

Puseletso Moloi, Ntswaki Mofolo, Nomsa Ngcongwane en Mapaseka Majorobella in die hof. Foto: Charne van der Merwe

Ná die voorval het Fourie bedank, terwyl die ander personeellede ná tugverhore ontslaan is.

Die verdediging het die staat voorheen daarvan beskuldig dat hulle verrigtinge vertraag en het die wettigheid van die inhegtenisnemings bevraagteken, asook die geloofwaardigheid van Tait se beëdigde verklaring, wat swaar op die videobeeldmateriaal staatmaak.

Die borgtogvoorwaardes vir al ses beskuldigdes is verleng.

• Het jy ’n nuuswenk om te deel? Bel of whatsapp die OFM Nuus-lyn: 066 487 1427.

OFM Nuus/Charne van der Merwe dg