Die vervaardiging van ProNutro is Woensdag (23/9) amptelik in Suid-Afrika gestaak nadat PepsiCo besluit het om die produk aan die mark te onttrek. Die besluit volg ná ’n uitgebreide hersieningsproses en terugvoer van verbruikers oor die nuwe smaak, tekstuur en mengbaarheid. 

ProNutro is in 1962 in Suid-Afrika bekend gestel en het oor die volgende ses dekades ’n bekende huishoudelike handelsnaam geword. Die produk is aanvanklik ontwikkel as ’n maklike bron van proteïen en voeding en is later bemark as die oorspronklike proteïengraan.

Dit was oor die jare ook in geure soos sjokolade, piesang en aarbei beskikbaar. Die probleme het vanjaar begin nadat PepsiCo New Generation ProNutro bekend gestel het.

Verbruikers kon glo nie aanklank vind by die nuwe geure nie. Foto: PepsiCo

Die verandering was glo nodig omdat die vervaardigingstoerusting verouderd geraak het. Dit was ook moeilik om in stand te hou. Die maatskappy het die vervaardigingsproses verander, terwyl die nuwe produk steeds plantgebaseerde proteïene, 13 vitamiene en vier minerale bevat het.

Die nuwe weergawe se suikerinhoud is met ongeveer 45% verminder. Die verandering het egter nie by almal aanklank gevind nie.

ProNutro-verbruikers het op sosiale media gekla oor die nuwe produk se smaak en tekstuur. Daar was ook klagtes dat dit nie maklik met melk meng nie.

ProNutro is in 1962 in Suid-Afrika bekend gestel. Foto PepsiCo

Sommige verbruikers sê hulle verkies die oorspronklike produk en het PepsiCo gevra om die ou resep terug te bring. PepsiCo het daarna terugvoer van verbruikers oorweeg en verskeie opsies oorweeg om die bekende ProNutro-ervaring te behou.

Die maatskappy sê dit is nie moontlik om die oorspronklike smaak en tekstuur te herskep nie.

Teen Augustus het dit ook moeiliker geword om by sommige winkels te kry, wat verdere vrae oor die toekoms van die handelsnaam laat ontstaan het.

PepsiCo sê die besluit is ná ’n lang en deeglike hersieningsproses geneem. Dit is ook nie duidelik of die besluit alle produkte onder die ProNutro-handelsnaam raak of slegs die graanproduk nie.

OFM Nuus dg

• Het jy ’n nuuswenk om te deel? Bel of whatsapp die OFM Nuus-lyn by 066 4871427.