Volgens Willem is dit nie nodig om ’n duur 4x4-voertuig en hope toerusting te hê om die land se afgeleë juwele te ontdek nie. “Werk met wat jy het,” sê hy. 

“Met ’n gewone voertuig wat ’n bietjie grondvryhoogte het, kan jy baie ver kom.”

Sy belangrikste raad? Vat jou tyd. Grondpaaie in landelike gebied kan jou stadiger laat reis, en die mooiste oomblikke lê juis daarin om stil te hou, foto’s te neem en die omgewing in te asem.

Hy beklemtoon ook die waarde van water en geduld. “Moenie sonder water reis nie, en moenie probeer jaag nie. Laat die pad jou verras.” 

’n Kaart of selfoon-app soos Tracks4Africa help jou om koers te hou, selfs sonder selfoonsein.

Soek ’n fokuspunt

Vir fotografieliefhebbers raai Willem aan om die goue uur te benut – sonsopkoms en -ondergang wanneer die lig sag en warm is. “Lig is die helfte van ’n goeie foto. Soek ook ’n fokuspunt, soos ’n boom of ’n paadjie wat draai, en beweeg jou kamera vir interessante komposisie.”

Wat sy gunsteling-bestemmings betref, noem hy die Noord-Kaap, die Oos-Kaap se Drakensberge, Lesotho en selfs die Suid-Vrystaat se “skyn-Karoo” rondom Philippolis en Smithfield. “Ons het ongelooflike plekke reg hier om die hoek – jy moet net die tyd neem om dit te gaan ervaar.”

Vir nog, gaan na ofm.co.za en klik op Get Wise Wednesday.

OFM Nuus cvs/mc/mvh