Diabetes raak miljoene mense wêreldwyd, en Suid-Afrika is geen uitsondering nie. Tog is daar steeds baie mense wat met diabetes saamleef sonder dat hulle daarvan weet, terwyl ander nie altyd oor die nodige kennis, behandeling of ondersteuning beskik om die toestand behoorlik te bestuur nie.

Tydens OFM se Familie-fokusweek plaas ons die kollig op diabetes. Yolanda Maartens gesels met kenners op die gebied en kyk na alles van bewustheid en simptome tot vroeë diagnose, voorkoming en die uitdagings van mense wat daagliks met diabetes saamleef.

Tema 1: Wêrelddiabetesdag – waarom bewustheid belangrik is

Margot McCumisky, nasionale bestuurder van Diabetes Suid-Afrika, gesels oor Wêrelddiabetesdag wat jaarliks op 14 November gevier word. Die gesprek fokus op waarom diabetesbewustheid so belangrik is, algemene wanopvattings oor die toestand en hoe gesinne, gemeenskappe en werkplekke mense met diabetes beter kan ondersteun.

Tema 2: Verstaan diabetes – tipes, simptome en risikofaktore

Dr Elmine du Toit, dosent aan die Universiteit van die Vrystaat se departement voeding en dieetkunde, verduidelik die verskillende tipes diabetes en hoe dit van mekaar verskil. Sy bespreek ook algemene simptome en risikofaktore, asook waarom dit belangrik is om die tekens betyds te herken.

Tema 3: Vroeë optrede – sifting, diagnose en voorkoming

Wanneer dit by diabetes kom, kan vroeë optrede ’n groot verskil maak. Dr Du Toit beklemtoon die belangrikheid van gereelde sifting en vroeë diagnose, en verduidelik hoe onbehandelde of swak beheerde diabetes tot ernstige komplikasies, soos skade aan die hart, niere, oë en senuwees, kan lei.

Tema 4: Diabetes in Suid-Afrika – ’n groeiende uitdaging

Hoe groot is die diabetesprobleem werklik in Suid-Afrika, en waarom word soveel mense steeds nie gediagnoseer nie? Dr Du Toit kyk na die uitdagings rondom bewustheid en toegang tot sifting, asook die belangrike rol wat skole en gemeenskappe kan speel om gesonde leefstylkeuses en voorkoming van jongs af aan te moedig.

Tema 5: Om met diabetes saam te leef – toegang tot sorg en ondersteuning

Margot McCumisky van Diabetes Suid-Afrika sluit weer by ons aan om te gesels oor die daaglikse bestuur van diabetes. Dit sluit medikasie, insulien, bloedsuikermonitering, gesonde voeding en fisieke aktiwiteit in. Die gesprek kyk ook na die uitdagings rondom toegang tot behandeling en mediese sorg in Suid-Afrika, asook hoe familie en vriende ondersteuning kan bied sonder om veroordelend te wees.

Margot deel ook meer oor hoe mense met Diabetes Suid-Afrika in aanraking kan kom vir inligting, hulp en ondersteuning, of om self by die organisasie betrokke te raak:
https://www.diabetessa.org.za/

Diabetes raak nie net die persoon wat daarmee gediagnoseer word nie, maar ook hul gesinne en gemeenskappe. Deur kennis te deel, vroeë optrede aan te moedig en ondersteuning te bied, kan ons saam ’n verskil maak. sm