Human Interest
Carel Boshoff oorlede - OFM praat met Jan Strydom─── 16:37 Wed, 16 Mar 2011
Christopher Motabogi
Orania - Professor Carel Boshoff is vanmiddag op Orania oorlede. Vryheidsfront Plus leier, Pieter Mulder, sê hy sal onthou word as 'n Afrikaner-denker, kultuurman, skrywer en teoloog. As stigter van Orania het hy Afrikaner-denkers uitgedaag om met konstruktiewe oplossings te kom ten einde die Afrikaner se toekoms in Afrika te verseker. Die 83-jarige Boshoff het in sy loopbaan onder meer as sendeling in Soweto gewerk. Mulder sê hy het ook groot persoonlike opofferings gemaak in belang van die Afrikaner. Dit het gemaak dat sy eerlikheid en opregtheid as wyse leier, deur mense van alle bevolkingsgroepe waardeer en bewonder is. President Jacob Zuma het nog onlangs professor Boshoff op Orania besoek en sy waardering uitgespreek vir sy bydrae oor baie jare asook vir die ondernemingsgees en suksesvolle projekte op Orania. Gemeenskapswoordvoerder, Jan Strydom, sê Boshoff is drie jaar gelede met kanker gediagnoseer. Hy het goed gereageer op behandeling, maar het 'n maand gelede weer baie siek geword.
Boshoff word Saterdag-oggend op Orania begrawe.
Carel Boshoff oorlede - OFM praat met Jan Strydom:
