Deutsche Welle berig dat David Lawrence, 'n ambisieuse tiener met 'n belangstelling in robottegnologie, vasbeslote is om Kenia te help om sy eerste robothond te onthul.

Hy het reeds vyf prototipes van robothonde geskep.

“Ek het my inspirasie vir ‘n robothond gekry ná aanvalle by ons grense. Daar is grensgeskille regoor Afrika en ook ons land. Dit het my laat dink, wat as ons masjiene kan skep om te veg, pleks daarvan om soldate te stuur?

"Dit is makliker om 'n masjien te vervang as om 'n menselewe te verloor."

Lawrence gebruik skrootmetaal om sy robotskeppings saam te stel. Dit bevat 'n toestel wat kunsmatige intelligensie gebruik.

Hy beweer sy uitvinding kan ploftoestelle deaktiveer en landmyne ontwapen.

“Ek het daarin geslaag om 'n paar prototipes te skep wat sekere probleme in ons samelewing kan oplos, soos militêre prosesse en om blinde mense en wetenskaplikes te help met eksplorasie.”

Hoewel sy skeppings aandag in plaaslike media trek, kon hy egter nog nie daarin slaag om die Keniaanse regering se oog te vang nie.

Hy doen 'n beroep op die regering om jong innoveerders soos hy te finansier.

OFM-nuus