Donkies in veral Wes-Afrika word toenemend deur trans-nasionale bendes geteiken wat voordeel trek uit lakse wetstoepassing, 'n geredelike aanbod van donkies en ‘n toenemende aanvraag uit Asië.

Volgens ‘n artikel deur die Instituut van Sekerheidstudies is donkievel baie gesog in China, waar die gelatien, ook genoem donkievelgom of ejiao, uit die vel onttrek en vir tradisionele medisyne en ander produkte verwerk word.

Dit word gebruik as 'n afrodisiakum, 'n bestanddeel in skoonheidsmiddels en vir die genesing van kwale soos bloedarmoede, droë hoes, chroniese moegheid en simptome van menopouse.

Nadat China se donkiebevolking van 11 miljoen in die 1990’s tot ses miljoen in 2013 gedaal het, en met ‘n hoë plaaslike markaanvraag van meer as vier miljoen donkievelle per jaar, het handelaars hul aandag op Afrika gevestig.  

In Niger het donkiegetalle reeds dramaties gedaal. Die uitvoer van donkievelle het tussen 2015 en 2016 van 27 000 tot 80 000 toegeneem, en die gemiddelde prys van 'n donkie het van €29 (R530) in 2012 tot €122 R2225) in 2016 gestyg. Hierdie neigings wek kommer dat hulle uiteindelik uit die land kan verdwyn.

In Mali slag ’n Chinese maatskappy glo daagliks 300 donkies en voer hul velle na China uit. In Burkina Faso is ongeveer 19 ton vel tussen Oktober 2015 en Januarie 2016 na China uitgevoer.

Volgens Simon Pope van The Donkey Sanctuary in Brittanje,  word donkies van so ver as Noord-Afrika, Tsjad en Kameroen na Burkina Faso vervoer, waar 'n groot mark bestaan.

“Van daar af word donkies na Ghana vervoer waar hulle geslag word. Daar word beraam dat 100 000 donkies elke jaar daar geslag word, en hul velle word na China en Hong Kong uitgevoer.”

‘n 2016-edik deur die Ekonomiese Gemeenskap van Wes-Afrikastate (Ecowas) bepaal dat lidlande nie donkies mag slag of uitvoer vir handel nie. In 2016 het die hoofde van veeartsenykundige dienste van alle Ecowas-lande 'n memorandum van verstandhouding (MoU) onderteken wat die handel in donkievelle beperk.

Maar aangesien die MoU nie wet is nie, is dit nie afdwingbaar nie en kan diegene wat dit oortree, nie vervolg word nie.

Lande soos Niger en Burkina Faso verbied die slag van donkies en die uitvoer van die dier, sy vleis en vel. Maar dit is nie genoeg om hul handel in Wes-Afrika te stop nie.

Die massa-uitwissing van donkies het dramatiese maatskaplike gevolge in Wes-Afrika. Die diere is 'n bron van inkomste en 'n manier om mense en goedere in landelike en stedelike gebiede te vervoer. Vroue maak op hulle staat om water en ander goedere te vervoer en sonder donkies loop kinders dikwels skool mis om hul ouers met huishoudelike take te help. Baie ouers kan nie skoolgeld bekostig nie weens die verlies aan inkomste wat deur donkie veroorsaak word.

OFM-nuus