Vir $11,99 per maand op die web en $14,99 per maand op iOS, sal gebruikers op Meta se Instagram- en Facebook-platforms hul identifikasiedokumente kan indien en 'n blou verifikasie-teken kry. Die diens sal hierdie week in Australië en Nieu-Seeland bekend gestel word, en nog lande sal volg, het Zuckerberg gesê.

"Hierdie nuwe kenmerk gaan oor egtheid en verbeterde sekuriteit," het Zuckerberg op Instagram geskryf.

Meta het voorheen verifikasie verleen aan noemenswaardige gebruikers soos politici, bestuurders, lede van die pers en organisasies. Die maatskappy se nuwe diens is soortgelyk aan Twitter se opgeknapte diens genaamd Twitter Blue, wat gebruikers ook 'n verifikasieteken gee as hulle 'n maandelikse fooi betaal.

Twitter het sy opgedateerde Twitter Blue-diens in Desember bekendgestel nadat die maatskappy se nuwe eienaar Elon Musk die aanvanklike bekendstelling uitgestel het. Die uitvoerende hoof van Tesla en SpaceX, wat Twitter in Oktober vir $44 miljard bekom het, het gesê die nuwe verifikasiestelsel sal “die groot gelykmaker” wees en “mag aan die mense gee”.

Twitter Blue is in November kortliks bekendgestel, maar dit is teruggetrek nadat gebruikers die nuwe betaalde opsie misbruik het deur bekendes en handelsmerke na te boots.

’n Woordvoerder van Meta het Sondag gesê Meta Verified-intekeninge sal teen soortgelyke nadbootsing beskerm word. Om te kwalifiseer, moet gebruikers minstens 18 jaar oud wees, aan minimum rekeningaktiwiteitvereistes voldoen en 'n ID indien wat ooreenstem met hul profielnaam en -foto.

Besighede kom nie tans in aanmerking om aansoek te doen vir Meta Verified nie, en die maatskappy het gesê gebruikers sal nie hul profielnaam, gebruikersnaam, geboortedatum of profielfoto kan verander sonder om weer deur die aansoekproses te gaan nie.

OFM-nuus