"Die era van Francafrique is verby," het Macron in opmerkings aan die Franse gemeenskap in Gaboen gesê, met verwysing na Frankryk se post-koloniseringstrategie om outoritêre leiers te ondersteun om sy belange te verdedig.

Emmanuel Macron says era of French interference in Africa is 'over' https://t.co/hoJvdIiVc3 pic.twitter.com/oMYOSsXCPC

— Nation Africa (@NationAfrica) March 3, 2023

Macron besoek vier Sentraal-Afrika-lande op 'n tydstip dat Frankryk 'n vlaag van vyandigheid van ontstelde voormalige kolonies in die Sahel-streek in Afrika in die gesig staar, wat die land dwing om sy troepe te onttrek.

Voor sy besoek het Macron Maandag besonderhede gegee oor die herontplooiing van Franse magte, ná hul vertrek uit Mali en die Sentraal-Afrikaanse Republiek in 2022 en uit Burkina Faso verlede maand.

Hy het gesê daar sal 'n "merkbare vermindering" in die getal Franse soldate in Afrika wees "in die komende maande" en 'n groter fokus op opleiding en toerusting van geallieerde lande se magte.

Macron het laat Woensdag in Gaboen, 'n hegte Franse bondgenoot, aangekom vir 'n konferensie oor die bewaring van tropiese woude – 'n inisiatief wat hy en Gaboense president Ali Bongo Ondimba by verlede jaar se VN-klimaatkonferensie onthul het.

Nadat hy Donderdag die beraadgedeelte van die konferensie bygewoon het, vertrek hy na Angola voordat hy Vrydag na die Republiek van die Kongo en die naburige Demokratiese Republiek van die Kongo vlieg.

OFM-nuus