On Now
Weekdays 12:00 - 15:00
At Lunch Pulane
NEXT: 15:00 - 18:00 The Joyride with James
Listen Live Streams

International

Orkaan Beryl keer krieketspelers in Barbados vas

───   06:41 Mon, 01 Jul 2024

Orkaan Beryl keer krieketspelers in Barbados vas | News Article
Protea-krieketspelers op ’n vlug na die VSA. Foto: X/Vishnu Vardhan

“Orkaan Beryl is Sondag as ’n kategorie 4-storm geklassifiseer, met die verwagting dat dit ernstige gevolge sal hê sodra dit in Barbados aanland.”

Orkaan Beryl is op pad na Barbados en die Karibiese Eilande waar krieketspelers, hul families, ondersteuners en joernaliste van Indië en Suid-Afrika gestrand is ná die eindstryd van die T20 Wêreldbeker 2024. Die lughawe is gesluit en vlugte is gekanselleer. Honderde wag nou dat Orkaan Beryl oorgaan en die gepaardgaande storms bedaar.

Vishnu Vardhan, ’n Indiese krieketondersteuner, het op X foto’s geplaas van sy “reddingsvlug” saam met van die spelers van die Suid-Afrikaanse krieketspan. “Hoop Barbados en mense is veilig, die orkaan lyk verwoestend,” het Vardhan getwiet.


Volgens Krieket Suid-Afrika sal verskeie lede van die Protea-span na Suid-Afrika terugkeer op ’n datum wat bevestig sal word. Die plan was om Woensdag 3 Julie na Suid-Afrika terug te keer. Die res van die span, wat by die Major League Krieket (MLC) gekontrakteer is, sal nie onmiddellik na Suid-Afrika terugkeer nie en sal na die VSA reis vir die toernooi. 

Altesaam sewe spelers sal in die MLC verskyn:
MI New York
Dewald Brevis (SA), Kagiso Rabada (SA)
Seattle Orcas:
Quinton de Kock (SA), Heinrich Klaasen (SA), Wayne Parnell (SA)
Texas Super Kings:
Faf du Plessis (SA)
Washington Freedom:
Marco Jansen (SA)

Brevis, Parnell en Du Plessis sal van Suid-Afrika na die VSA reis.

Die Indiese span was veronderstel om ’n Emirates-vlug van New York via Dubai te haal, maar oorweeg nou ’n huurvlug vanaf Bridgetown. Die span sal volgens IndiaToday waarskynlik in Barbados vasgekeer wees weens die orkaan wat Maandag sy koers na die Karibiese eilandnasie inslaan.

‘Alle uitgaande vlugte is gekanselleer’

Die T20-kampioene van Indië se reisplanne is in die wiele gery en hulle het verkies om by hul hotel te bly. “Barbados-lughawe sal gesluit word en vlugte is gekanselleer. Selfs die Indiese span sal hier vasgekeer wees totdat die orkaan bedaar, en die lughawe bedrywighede hervat. Alle uitgaande vlugte is gekanselleer,” het IndiaToday berig. “Die span was veronderstel om van hier (Bridgetown) na New York te vertrek en dan Indië via Dubai te bereik. Maar nou is die plan om 'n huurvlug reguit van hier na Delhi te kry. 'n Vergadering met Eerste Minister Narendra Modi word ook oorweeg,” het die bron gesê.

Beryl is Sondag as ’n kategorie 3-storm geklassifiseer, met die verwagting dat dit ernstige gevolge sal hê sodra dit in Barbados aanland. Dit het egter nou verskerp volgens IndiaToday se Vikrant Gupta en is opgegradeer na ’n Kategorie 4, wat die tweede ernstigste een is. 

In die jongste twiet het Gupta gesê dat die Barbados-lughawe gesluit is en dat ’n aandklokreël nou geld, aangesien niemand toegelaat word om uit te gaan nie. Beryl sal na verwagting Barbados in die volgende paar uur tref en die Indiese span sal binnenshuis bly. Die Indiese kontingent is ongeveer 70 lede en sluit die krieketspan, ondersteuningspersoneel, gesinne en amptenare in.

Die orkaanwaarskuwing is uitgereik vir Barbados, St. Lucia, St. Vincent en die Grenadines, Grenada en die eiland Tobago. Die eiland Martinique was onder 'n tropiese stormwaarskuwing, terwyl Dominica, Trinidad en dele van die Dominikaanse Republiek en Haïti onder 'n tropiese stormwag was.

Eerste Minister Mia Mottley van Barbados het die land Sondagaand toegespreek om ’n opdatering oor Beryl te verskaf. Sy het gesê die orkaan sal na verwagting sowat 80 myl suid van die eiland verbysteek, wat sterk tropiese stormwinde van 40 tot 60 m.p.h. sal meebring en die moontlikheid van rukwinde wat orkaansterkte kan bereik.

Sy het opgemerk dat skuilings regoor die land oop was en hulle voorberei vir diegene wat skuiling soek teen die storm. ’n Paar honderd mense het reeds by die 33 amptelike skuilings eilandwyd aangekom, het sy gesê.

Die “uiters gevaarlike” kategorie 4-orkaan sal na verwagting lewensgevaarlike winde en kitsvloede na die Karibiese Eilande bring, volgens die Verenigde State se nasionale orkaansentrum (NHC). Dit is die eerste orkaan van die 2024-seisoen, wat jaarliks van 1 Junie tot 30 November duur.

Suid-Afrika se kaptein, Aiden Markram, het gesê hy is “omgekrap” nadat sy span hul eerste T20 Wêreldbeker-eindstryd ooit met sewe lopies teen Indië verloor het.

Die Proteas het tot op hede sewe vorige Wêreldbeker-halfeindstryde oor beide 20-boulbeurt- en 50-boulbeurt-krieketformate verloor, maar hulle het gehoop om dit vanjaar te verander.

Suid-Afrika het ’n onoorwonne rekord regdeur die toernooi gehandhaaf in uitdagende wedstryde teen Nepal, Nederland, Bangladesj en Engeland. In hul oorwinning oor die Wes-Indiese Eilande in die Super Agt-fase was daar slegs vyf balle oor.

Die Proteas sal na verwagting steeds ’n helde-verering by die OR Tambo Internasionale Lughawe van krieketaanhangers van regoor die land ontvang.

OFM Nuus cg




@ 2024 OFM - All rights reserved Disclaimer | Privacy Policy | We Use Cookies - OFM is a division of Central Media Group (PTY) LTD.