Ondersoekers bestudeer kringtelevisiebeeldmateriaal en reisrekords om vas te stel wie die sak aan boord gebring het. Die wyfie, wat nou Oyster genoem word, is Vrydag (17/7) op ’n roete 302-bus by Kensal Rise in die noordweste van Londen gevind.

’n Ma kon nie haar stootwaentjie deur die gang beweeg nie omdat die groot sak by die bagasieruimte uitgesteek het. Toe die bestuurder die sak verskuif, het die apie begin tjirp en rondspring.

Hy het ontdek sy is in ’n klein wit metaalhok geplaas wat binne-in die geruite plastieksak versteek was. Sy het ’n stukkie appel gehad, maar was volgens die DBV bang, ontwater en ontsteld.

Die hokkie waarin die apie aangetref is binne-in ’n drasak. Foto: RSPCA

Die bestuurder het Oyster na Metroline se busdepot in Willesden geneem, waar personeel haar in ’n donker, koel ruimte gehou het om haar te kalmeer. Hulle het daarna die Royal Society for the Prevention of Cruelty to Animals, oftewel die RSPCA, ontbied om haar te versorg.

Clare Dew, die RSPCA se hoofondersoeker in Londen, meen die verlating was doelbewus. Niemand het vroeër iets ongewoons op die bus opgemerk nie, maar die organisasie hoop dat kringtelevisiebeeldmateriaal en elektroniese betaalrekords sal help om die verantwoordelike persoon te identifiseer.

’n Spesialisveearts het Oyster ondersoek en bevind dat sy gesond is. Sy woon nou in ’n reservaat met gespesialiseerde primaatgeriewe en het volgens die versorgers goed aangepas. Die reservaat het toevallig reeds na ’n wyfie gesoek as maat vir ’n alleenstaande marmosetmannetjie.

Oyster sal na verwagting binnekort aan die mannetjie voorgestel word. Indien niemand haar opeis nie, sal sy permanent in die reservaat bly, waar ervare versorgers, ’n geskikte kamp en die geselskap van ’n ander marmoset beskikbaar is.

Die RSPCA vrees dat dié geval die eerste van talle soortgelyke verlatings kan wees. Nuwe wetgewing wat in April in werking getree het, vereis dat alle primate wat in Engeland aangehou word, gelisensieer en met mikroskyfies toegerus moet wees.

‘Mense wat nie betyds ’n lisensie bekom het nie, kan ’n onbeperkte 
boete of tronkstraf opgelê word’

Eienaars moet ook bewys dat die diere onder toestande aangehou word wat aan streng welsynstandaarde voldoen. Mense wat nie betyds ’n lisensie bekom het nie, kan ’n onbeperkte boete of tronkstraf opgelê word. Oyster het nie ’n mikroskyfie gehad nie.

Die Britse regering raam dat ongeveer 5 000 primate in Engeland as troeteldiere aangehou word. Die RSPCA het tussen 2021 en 2025 altesame 238 verslae oor die verwaarlosing of mishandeling van primate ontvang.

Dierewelsyndeskundiges waarsku dat primate intelligente, sosiale wilde diere is wat baie ruimte, geestelike stimulering en geskikte maats nodig het. Menslike geselskap alleen kan nie in hierdie behoeftes voorsien nie. Eienaars wat sukkel, word gevra om eerder veeartse, spesialisgroepe of liefdadigheidsorganisasies te nader as om die diere te verlaat.

OFM Nuus sm

•Het jy ’n nuuswenk om te deel? Bel of whatsapp die OFM Nuus-lyn by 066 487 1427.