National
Gedeeltelike sonsverduistering vandag in sentraal Suid-Afrika─── DANE BEISHEIM 09:37 Thu, 01 Sep 2016
Klerksdorp - Tesame met Lentedag kan sentraal Suid-Afrikaners vandag ook uitsien na ‘n gedeeltelike sonsverduistering – ’n verskynsel waar slegs ‘n gedeelte van die maan voor die son inbeweeg.
Volgens Eugene Engelbrecht, ’n ruimte-fisikus van NWU se Potchefstroom-kampus, is die beste uitkykpunt vir die verduistering in die sentrale gedeeltes van die land, veral Noordwes.
Hy sê die dekking wat in Klerksdorp ervaar sal word, is minstens 35%, terwyl dit in ‘n gebied soos Durban aansienlik minder sal wees.
“Dit is uiters belangrik om te noem dat jy onder geen omstandighede, selfs tydens ‘n sonsverduistering, ooit direk na die son moet kyk nie. As jy die gedeeltelike sonsverduistering wil sien, is daar spesiale son-kykers wat jy kan aankoop, of andersins kan jy daarna kyk deur die donker gedeelte van ‘n ou x-straal,” waarsku Engelbrecht.
Die verduistering sal om-en-by 09:00 begin en sy hoogtepunt rondom 11:00 bereik, waarna die skaduwee geleidelik sal wegbeweeg. Die hele verskynsel sal teen 12:00 verby wees.
OFM-nuus
Have you seen the #PartialEclipse yet? Send us your snaps at news@ofm.co.za #solareclipse #annulareclipse pic.twitter.com/tw8Z7MHX7d
— OFM News (@OFMNews9497) September 1, 2016