Mielies:

• Die CBOT-mieliekontrakprys vir die Desember-kontrak het oornag onveranderd verhandel.
• Dit volg op die vrystelling van die WASDE-verslag Woensdagaand. Wêreldwye mielieproduksie is afwaarts hersien na 1 168 740 000 ton. Dit is gevolg deur afnames in globale uitvoer sowel as eindvoorraad. 
• In die VSA is opbrengsverwagtinge saam met produksie verlaag. Stygings in invoer is egter by die aanbod gevoeg. Amerikaanse eindaandele is verlaag vanaf die vorige verslag, en is ook laer jaar-tot-jaar, wat die VSA met 'n stywe vraag-en-aanbodstaat laat. 
• Europa, wat 'n groot mielie-invoerder is, het ook produksie verlaag (weens voortslepende droogtetoestande) en invoer verhoog.
• Die plaaslike SAFEX-mieliekontrakte het Donderdag met effense opwaartse tendense verhandel vir beide wit- en geelmieliekontrakte. Die witmieliemark het, vir lewering in Oktober 2022, R25/ton (+ 0,49%) geklim om teen R5 090/ton te sluit. 
• Die geelmieliemark het vir lewering in Oktober 2022, R27/ton (+ 0,54%) hoër verhandel om teen R5 005/ton te sluit. Die witmieliemark het, vir lewering in Desember 2022, R28/ton (+ 0,54%) geklim om teen R5 167/ton te sluit. 
• Die geelmieliemark het vir lewering in Desember 2022, R28/ton (+ 0,56%) hoër verhandel om teen R5 088/ton te sluit.
• Vir die week geëindig 7 Oktober is altesaam 65 868 ton mielies aan kommersiële silo's gelewer. Daarvan was 34 695 ton witmielies en 31 173 ton geelmielies. In vergelyking met die oesskatting vir die 2022/2023-bemarkingsjaar, is 92% van witmielies gelewer en 88% van geelmielies.

Sojaboon:

• Die CBOT-sojaboonkontrakprys vir die naaste kontrakmaand het Donderdagoggend met 1,44% gestyg.
• Ná die vrystelling van die jongste WASDE-verslag, is wêreldwye sojaboonproduksie verhoog. Globale eindvoorrade is ook verhoog. Produksie vir Argentinië is egter effens verlaag en produksie vir Brasilië is verhoog.
• Die binnelandse sojaboonkontrakte het Donderdagoggend met skerp opwaartse tendense verhandel. Die plaaslike sojaboonmark het vir lewering in Oktober 2022 met R186/ton (+ 1,89%) hoër verhandel om uiteindelik te sluit op R10 030/ton. Die sojaboonmark het vir lewering in Desember 2022, R218/ton (2,18%) hoër verhandel om teen R10 200/ton te sluit.
• Produsentelewerings vir die week geëindig 7 Oktober het 1 757 ton beloop. Die kumulatiewe totaal van sojaboonlewerings staan op 2 136 119 ton. Dit maak 97% uit van die huidige oesskatting van 2 201 000 ton.

Koring:

• Die CBOT-koringkontrakprys vir die naaste handelsmaand het Donderdagoggend 2,09% laer verhandel.
• Dit volg op die vrystelling van die WASDE-verslag Woensdagaand. Wêreldwye koringproduksie en eindvoorrade is afwaarts hersien vanaf die vorige verslag. Eindaandele het jaar-tot-jaar wêreldwyd afgeneem. 
• In Australië is produksie en eindvoorraad ook verlaag. Produksie in die Europese Unie is egter effens opwaarts hersien. Australië en Rusland, wat albei groot uitvoerlande is, is van plan om goeie winterkoringoeste te hê. Hierdie lande is tans in die groeiende stadiums van produksie.
• Die binnelandse koringkontrakte het Donderdag met effense opwaartse tendense verhandel. Die plaaslike koringmark het vir lewering in Oktober 2022 met R58/ton (+ 0,79%) hoër verhandel om uiteindelik te sluit op R7 360/ton. Die Desember 2022-koringkontrak het met R19/ton (+ 0,26%) hoër verhandel om uiteindelik te sluit op R7 393/ton.
• Vir die week wat op 7 Oktober eindig, is altesaam 2 401 ton koring aan kommersiële silo's gelewer. Dit is die eerste aflewerings vir die 2022/23-bemarkingsjaar. Die koringoes word op 'n totaal van 2 218 775 ton geraam.

Vir meer inligting oor die huidige kommoditeitsmark, besoek gerus Graan SA se webtuiste.

OFM-nuus