Die Wes-Kaap is die afgelope tyd swaar getref deur vernietigende oorstromings. 

Dié provinsie is 'n deurslaggewende streek vir Suid-Afrika se wintergewasse, druiwe en tuinbou.

Volgens berigte was Bredasdorp in die Suidelike Overbergstreek een van die gebiede wat erg geraak is.

Wandile Sihlobo, landbou-ekonoom by die Landbousakekamer van Suid-Afrika, sê aansienlike skade is aan plaasinfrastruktuur, elektrisiteitstoevoeronderbrekings en padnetwerke in verskeie klein boerderydorpe gerig, hoofsaaklik in die suidelike streke van die Wes-Kaap.

Bykomende uitdagings

Boere word nou deur bykomende uitdagings in die gesig gestaar as gevolg van die baie reën. Dit sluit in versadigde grond, wat konvensionele trekkergebaseerde bedrywighede vir onkruiddoder- en kunsmisbespuiting belemmer. 

"In reaksie hierop wend sommige boere hulle tot hommeltuie vir doeltreffende en presisie-bespuiting, wat 'n positiewe stap na tegnologiese innovasie toon, veral te midde van ongunstige weerstoestande," sê Sihlobo.

Impak op druiweprodusente

Die impak van die vloede op wyn- en tafeldruiwe bly onseker, met tuinboukundiges wat die lande aktief beoordeel. 

Vroeë aanduidings toon skade aan bergingsfasiliteite en saailande in die suidelike dele van die Wes-Kaap. 

Sihlobo deel verder dat die oormatige reën kommer laat ontstaan het oor moontlike impakte op die opbrengspotensiaal van wintergewasse soos koring, gars en kanola. Hy sê alhoewel minimale skade aan gewasse verwag word, kan daar kommer wees oor die oeskwaliteit, veral in die suidelike streke.

Koringoesskatting

Die Oesskattingskomitee het einde September sy tweede produksieskattings vir wintergewasse vrygestel en die koringoesskatting op 2,1 miljoen ton gehandhaaf – 'n 1%-toename vanaf die vorige seisoen. 

Hierdie projeksie, ver bo die 10-jaar gemiddelde oes van 1,8 miljoen ton, word ondersteun deur die verwagte aansienlike oes in die Wes-Kaap en Limpopo, wat swaarder weeg as die verwagte afname in ander provinsies.

OFM Nuus