Die Vrystaatse dorp Parys het onlangs met trots die derde kwalifiserende rondte van Lamb Champs 2025 by die Afridome aangebied. Met Pick n Pay as hoofborg, Toyota as drywer en Old Mutual as kategorieborg, het die dag boere, vleisliefhebbers en gemeenskappe van regoor die land saamgebring om gesinsboerdery, gehaltelamsvleis en ware Suid-Afrikaanse erfenis te vier.

Die Parys-vertoning het boere uit vier provinsies gelok, met die Vrystaat wat die grootste groep van 26 inskrywings opgelewer het. Ander verteenwoordiging het gekom van Noordwes, die Noord-Kaap en Gauteng.

Sterk rasverteenwoordiging

Die merino (14 inskrywings) en Dormer (6 inskrywings) was die sterkste verteenwoordig, tesame met meatmaster, Döhne Merino, Dorperkruise, Ile de France, landskaap, Hampshire Down, karakoel, swartkoppersie en ander. Hierdie mengsel het beide tradisie en innovasie in lamproduksie beklemtoon.

Eerste plek, Liza-Mari Jonker, Minki vd Westhuizen, Hennie Jonker, Miane Jonker en Liam Jonker. Foto verskaf

Wenners van die Lamb Champs Parys was: 

• 1ste plek Hennie Jonker van Kroonstad,
• 2de plek Ancois Potgieter van Tweeling,
• 3de plek Niekie en Christo van Steynsrus,
• 4de plek Barnie Venter van Reddersburg, en
• 5de plek Francois Venter van Reddersburg, Vrystaat.

Gemeenskapsbetrokkenheid beklemtoon

“Elke streek bring sy eie unieke verhaal na Lamb Champs. Om verskillende provinsies te besoek, gaan nie net daaroor om boere van daardie gebiede die geleentheid te gee om mee te ding nie, maar ook om verbruikers in hul gemeenskappe te ontmoet. 

“Dit bou brûe tussen mense wat ons kos produseer, ons kleinhandelvennoot Pick n Pay en die mense wat dit geniet,” sê Francois Rossouw, Uitvoerende Hoof van Saai.

 Vir meer inligting besoek www.lambchamps.co.za.

OFM Agri/Isabel van Tonder mvh