Die restaurant het onlangs ’n goue medalje op die Japan Fried Chicken Grand Prix gewen, en eienaar Yoshihiro Tsuchiya het onthul ’n klein hoeveelheid van hul braai-olie word elke dag behou sedert die restaurant 66 jaar gelede sy deure geopen het. Maar voordat jy skrik – hulle braai nie vandag nog in dieselfde pot olie van 1960 nie.

Elke aand word die olie deeglik gefiltreer om kosreste en onsuiwerhede te verwyder. Daarna word net ’n klein bietjie van die ou olie gehou en met vars olie gemeng vir die volgende dag se braaiwerk. Volgens Tsuchiya gee daardie “verouderde olie” die hoender ’n ryker aroma en ’n unieke geur wat splinternuwe olie nie kan naboots nie.

Lees ook: Weird Wide Web - Die veld van die gode: Mexiko se ikoniese sokkerveld

Die onthulling het groot debat op sosiale media ontketen. Party mense meen dis ’n briljante tradisie, terwyl ander bekommerd is dat dit moontlik gesondheidsrisiko’s kan inhou.

Voedselkenners sê hoewel die olie daagliks skoongemaak en met vars olie aangevul word, kan kookolie wat oor lang tydperke herhaaldelik verhit word, skadelike verbindings vorm, insluitend transvette en ander stowwe wat gesondheidsrisiko’s kan verhoog.

Ondersteuners vergelyk die metode met restaurante wat al dekades lank dieselfde sopbasis gebruik deur dit voortdurend met vars aftreksel aan te vul. Kritici wys egter daarop dat braai-olie heeltemal anders reageer as sop.

Of jy dit nou as kulinêre briljantheid beskou of glad nie daaraan wil proe nie, een ding is seker – hierdie 66-jarige “geheime resep” laat mense wêreldwyd behoorlik kopkrap!

Lees meer sm