Navorsers van King’s College London en Monash-universiteit in Australië toets ’n neussproei wat ’n sintetiese weergawe van ’n verbinding genaamd 5-MeO-DMT bevat. En die vroeë resultate laat beslis wenkbroue lig – en nie net oor die vreemde bestanddeel nie!

Anders as sommige psigedeliese middels waarvan die uitwerking ure lank kan duur, begin 5-MeO-DMT binne enkele minute werk, maar die intense effek verdwyn gewoonlik ná ongeveer ’n halfuur. Dit kan die behandeling makliker maak om in ’n kliniek toe te dien, sonder dat pasiënte vir die grootste deel van die dag onder mediese toesig hoef te bly.

Byna 200 volwassenes tussen die ouderdomme van 18 en 75 het aan ’n fase-twee-kliniese proef deelgeneem. Almal het met behandelingsweerstandige depressie saamgeleef en het reeds tussen twee en vyf verskillende antidepressantbehandelings probeer sonder voldoende verligting.

Lees ook: Weird Wide Web – Mens se as word speelbare grammofoonplaat

Deelnemers het óf ’n enkele dosis van 8 mg of 12 mg van die neussproei ontvang, óf ’n plasebo – ’n onaktiewe behandeling. Nóg die deelnemers nóg die navorsers het geweet wie watter behandeling ontvang het. Die navorsers het gevind dat albei dosisse met vinnige verbetering in depressiesimptome verband gehou het. Die voordele het binne 24 uur begin wys en vir verskeie weke voortgeduur.

Ná ongeveer ’n maand het tussen 18% en 26% van die mense wat die behandeling ontvang het, remissie bereik. Dit beteken hul simptome het tot onder die vlak gedaal wat as depressie beskou word. In die plasebogroep was dié syfer 8%. Ongeveer een uit elke drie mense wat die aktiewe behandeling ontvang het, se depressietelling het ook met minstens 50% verbeter.

Daar was wel ’n paar newe-effekte, waaronder naarheid, angs en paniekaanvalle. Die navorsers beskryf dit egter as oor die algemeen lig, en dit het meestal op die dag van behandeling voorgekom. Sowat 85% van die deelnemers kon binne twee uur die kliniek verlaat.

Die bevindings kan belangrik wees omdat baie mense met depressie nie voldoende op bestaande antidepressantbehandelings reageer nie. Maar dit was ’n fase-twee-proef, wat beteken verdere navorsing is nodig om vas te stel hoe veilig en doeltreffend die behandeling werklik voordat dit as ’n goedgekeurde opsie beskikbaar kan wees.

En voordat iemand nou ’n padda en ’n spuitbottel begin soek, hier is die belangrike deel: Die behandeling behels nie dat regte paddagif in ’n neussproei gedruk word nie. Die navorsers gebruik ’n sintetiese weergawe van die verbinding. Hoewel die idee van ’n paddageïnspireerde behandeling dalk soos iets uit ’n sprokie klink, is die wetenskap daaragter baie werklik – al is dit nog vroeg in die navorsingsproses.

Wie sou nou kon dink dat ons dalk eendag ’n padda sal bedank omdat hy navorsers help om nuwe maniere te ondersoek om depressie te behandel?  Moet net nie verwag dat jy in ’n prins gaan verander nie. Dít val onder ’n heel ander mediese afdeling!

Lees meer sm