Elke ouer ken daardie oomblik wanneer jy desperaat iets gedoen wil kry, maar jou kleinding het ander planne. Wel, die egpaar het ’n buitengewone oplossing vir die probleem gevind. Fuki Sato en haar man het gesukkel met hul eenjarige seun wat in trane uitbars sodra hy besef sy is nie naby nie. 

Elke ma sal graag op twee plekke gelyktydig wil wees, maar sy kan nie 24 uur per dag by haar kind wees nie. Hulle het lewensgrootte kartonuitknipsels van Fuki laat druk en dit oral in die huis geplaas. En, gehoop hul seuntjie sou glo dit is sy ma.

Dit het min of meer gewerk! Die eerste karton-mamma het die kleinding vir sowat 20 minute gelukkig gehou voordat hy besef het dat iets nie heeltemal pluis is nie. Dalk het die feit dat sy nie haar oë geknip het nie, die geheim verklap! Dit was belowend genoeg vir die ouers om dit weer te probeer. Hulle het nog 'n uitknipsel gemaak en hierdie keer het dit blykbaar selfs beter gewerk.

Lees ook: Weird Wide Web – Kan ’n KI-kletsbot jou verhouding help?

Die pa het die eksperiment op sosiale media geplaas en gewys hoe Fuki haar karton-dubbelganger in die kombuis plaas en dan stilletjies by die voordeur uitloop. Die seuntjie het vrolik voor die televisie bly speel en af en toe na sy baie stil ma gekyk, terwyl pa van die bank af toegekyk het. 

Hy verduidelik dat sy seun gewoonlik begin huil sodra sy ma verdwyn, maar die lewensgrootte kartonfiguur het blykbaar 'n tydelike oplossing gebied.  Die storie het vinnig versprei en mense wêreldwyd was vermaak deur die gesin se kreatiewe benadering tot ouerskap.

Natuurlik sal karton-mamma nie doeke kan omruil, middagete kan voorberei of behoorlike drukkies kan gee nie. Maar sy het wel 'n baie nuttige eienskap – sy het nooit 'n koffiepouse nodig nie!  En wie weet? Dalk is dit die begin van 'n splinternuwe tendens. Sodra jou kleuter begin vra hoekom mamma nooit beweeg nie, is dit dalk tyd om die plan te heroorweeg!

Lees meer