Malema en Snyman verskyn vandeesweek in die streekhof in Oos-Londen op drie aanklagte van die oortreding van die Wet op Vuurwapenbeheer vir die onwettige besit van ‘n vuurwapen en ammunisie, wat dateer uit 2018 toe Malema by ‘n EFF-byeenkoms glo skote afgevuur het nadat Snyman, sy lyfwag, ‘n vuurwapen aan hom oorhandig het.

Malema se regspan voer aan dat Olivier sy regte geskend het. “Olivier het ‘n botsing van belange omdat sy toegelaat het dat ‘n getuie wat reeds getuienis gelewer het, sy verklaring verander het,” sê EFF-woordvoerder, Sinawo Tambo.

“Olivier het daarop aangedring dat 'n staatsgetuie sekere waarnemings en gevolgtrekkings oor videobewyse maak terwyl die getuie reeds getuienis gelewer het.”

ALSO READ: Malema firearm discharge case gets underway in EL

AfriForum, wat die saak aanhangig gemaak het, sê die EFF maak op “vertragingstaktieke staat in ’n poging om geregtigheid te vertraag".

Malema se regspan het Woensdag ’n verhoor binne ’n verhoor versoek om te bepaal of die videobewyse – wat na bewering wys dat Malema die wapen afvuur – toegelaat moet word. Landdros Olivier het beslis dat die videobewyse toegelaat kan word.

“Dit is niks meer as ’n doelbewuste misbruik van die regstelsel om die verrigtinge onnodig te vertraag nie. As Malema onskuldig was, sou sy regspan sekerlik die geleentheid aangegryp het om dit te bewys. Die videobewyse is egter baie duidelik,” sê AfriForum se woordvoerder vir gemeenskapsveiligheid, Jacques Broodryk.

“Ons sal voortgaan om hierdie saak noukeurig te monitor, ongeag hoeveel keer dit uitgestel of vertraag word om te verseker dat Malema tot verantwoording geroep word. Politici moet daaraan herinner word dat hulle nie bo die wet verhewe is nie.”

OFM-nuus