Burgers sal net vereis word om hul identiteitskaarte by grensposte te toon.

Die president van Botswana, Mokgweetsi Masisi, en sy Namibiese eweknie, Hage Geingob, het die nuwe paspoortvrye reisreëling by die Mamuno-grensoorgang bekend gestel. Masisi sê die afskaffing van paspoorte is nodig om eenheid tussen die twee bure en ander Suider-Afrikaanse state te bevorder, volgens 'n artikel op Public Sector Global.

"Die gebruik van nasionale identiteitsdokumente om ons grense oor te steek, is 'n duidelike bewys van ons standvastige verbintenis om verhoudings tussen ons lande te bevorder en sosiale samehorigheid onder ons burgers te bevorder, sowel as om streeksamewerking en integrasie te verbeter," sê hy.

Geingob sê dit is ‘n belangrike stap in die rigting van integrasie tussen lande van die Suider-Afrikaanse Ontwikkelingskonferensie, en uiteindelik die hele kontinent.

Namibië en Botswana, twee van Afrika se mees stabiele lande, deel 'n 1 500 km-lange grens met vyf amptelike grensposte. Geingob sê die afskaffing van die gebruik van paspoorte sal nie misdadigers toelaat om vrylik die grens oor te steek nie.

“As jy 'n misdadiger is, sal ons jou kry. Vir die burgers van ons twee lande word die gebruik van identiteitskaarte as reisdokumente in plek gestel vir die gerief van ons burgers.”

Masisi sê Botswana gaan binnekort 'n elektroniese identiteitskaart instel. "Die Botswana-paspoort is 'n elektroniese dokument wat biometriese inligting bevat wat gebruik kan word om die identiteit van reisigers te verifieer. Die regering van Botswana het 'n proses begin om die nasionale identiteitskaart in 'n elektroniese identiteitskaart om te skakel.”

OFM-nuus