Die minster van basiese onderwys het weer teruggekap na kritici wat sê die land se slaagsyfer vir die Nasionale Senior Sertifikaat is 30%.

Onderwyskenners en opposisiepartye het voorheen die Departement van Basiese Onderwys gekritiseer omdat die laagste moontlike slaagsyfer vir ’n vak 30% is.

Angie Motshekga en Matome Chiloane, Gautengse LUR vir onderwys, was Woensdag (17/1) by die Kgatoentle Secondary School in Ga-Rankuwa vir die amptelike begin van die 2024-skooljaar.

#BackToSchool2024 Education Minister Angie Motshekga tells the learners that it is not true that she is encouraging a 30% pass.

“But I am not gonna make a child repeat a class because of 30% pass in Afrikaans when they have at least 4 level 7s for other subjects,” pic.twitter.com/8ZttSUKS38

— Jacaranda News (@JacaNews) January 17, 2024

Motshekga sê die “30%-slaagsyfer” is ’n mite wat elke jaar voorgehou word, maar leerlinge kan ook nie gestraf word vir ’n een-vak-mislukking nie.

“Ek sal nie ’n kind ’n graad laat herhaal weens 30% in Afrikaans wanneer hulle minstens vier vlak 7’s vir ander vakke het nie,” sê Motshekga.

“Ons assesseer leerlinge op grond van vyf vakke; ons kombineer nie al die punte om ’n slaagsyfer te kry nie; dis hoe dinge in die verlede gedoen is. Ons doen dit nie meer nie.”

Die nasionale onderwysgehalteversekeringsliggaam, Umalusi, het die uitreiking van die 2023-matriekuitslae Maandag goedgekeur.

Op ’n mediakonferensie het Yunus Ballim, voorsitter, gesê die uitslae het die groen lig gekry nadat dit deur die Departement van Basiese Onderwys en die Onafhanklike Eksamenraad geadministreer is.

Hy het bygevoeg dat onreëlmatighede wat tydens die skryf- en nasienfase van die eksamen geïdentifiseer is, “nie sistemies was nie en dus nie die algehele geloofwaardigheid en integriteit van die eksamen in die gedrang gebring het nie”.

Statement: Umalusi has approved the release of the 2023 end of the year National Examinations Results of all assessment bodies (DBE, DHET, IEC & SACAI).

The full statements are available on the website: https://t.co/ssch3q98IX#ExamResults2023#MakoyaCertificates#ClassOf2023 pic.twitter.com/gV3qbNhens

— Umalusi (@UmalusiSA) January 15, 2024

Ballim het egter opgemerk dat Umalusi bekommerd is oor die herhalende gevalle van druk- en verpakkingsfoute in vraestelle, wat meer fokus op kontrole vereis.

Leerders kan op die volgende maniere toegang tot hul uitslae kry (of registreer om dit te ontvang):

• Leerders kan hul uitslae direk by die skool of instansie kry waar hulle die eksamen afgelê het. Hierdie uitslae sal dalk eers ná 12:00 op die uitreikingsdag toeganklik wees.
• Leerders kan ook direk toegang tot hul uitslae kry deur hier by die Departement van Basiese Onderwys se webwerf aan te meld. Voor hulle bevestiging van hul registrasie ontvang, sal kandidate 'n tweestap-verifikasieproses moet voltooi. Hulle moet hul identiteitsnommer en eksamennommer verskaf om te registreer. Toegang tot die DBE-webwerf kan sonder datakoste verkry word, wat beteken toegang kan verkry word ongeag of die gebruiker data het of nie.
• ’n Aantal aanlyn nuuswebwerwe sal die uitslae publiseer. Matriekkandidate wat die eksamen deur die Onafhanklike Eksamenraad geskryf het, kan vanaf 00:01 op Donderdag 18 Januarie, aanlyn toegang tot hul uitslae kry, terwyl die uitslae van die openbare skoolstelsel op Vrydag 19 Januarie om 06:00 aanlyn gepubliseer sal word vir agt van die nege provinsies.
  (Die Wes-Kaap sal sy uitslae om 16:00 dieselfde dag publiseer.)
• Om hul matriekuitslae te ontvang, kan leerders hul eksamennommer SMS na 45856. Die stelsel sal hul eksamennommer verifieer en dan hul uitslae aan hulle stuur. Elke SMS kos R1,50, en gratis SMS'e kan nie gebruik word nie.
• Leerders kan hul matriekuitslae ontvang deur die USSD-kode *120*45856# te gebruik en hul eksamennommer in te voer om te registreer. Die leerder se matriekuitslae sal dan na hul foon gestuur word sodra dit beskikbaar is. Die USSD-diens sal teen R1,50 per minuut gehef word.
• Laai die MatricsMate app gratis af by Google Play en Apple App Stores.
  Die meeste Saterdagkoerante sal die matriekuitslae op 20 Januarie publiseer.

Wat as ek my matriekuitslae wil verbeter?

As jy nie tevrede is met jou uitslae nie, is die volgende geleentheid om jou uitslae te verbeter in Junie. Volgens die departement kan jy vir die Junie NSS-eksamen aanlyn of by ’n distrikskantoor registreer – nie later nie as 8 Februarie.

OFM Nuus cg/dg/mc