Darren Scott (61) is vroeg Dinsdag (27/5) oorlede ná ’n dekades lange stryd teen stadium 4-melanoom, ’n aggressiewe vorm van velkanker. 

Sy dood is deur sy werkgewer, HOT 102.7FM, bevestig, wat gesê het die laaste paar maande was besonder moeilik en is gekenmerk deur talle hospitalisasies. “Darren sal onthou word vir sy passie vir radio, sy humor, kreatiwiteit en sy liefdadigheidswerk,” sê die stasie.

Darren Scott was dekades lank in sy element agter talle radiostasies se mikrofoon. Skermskoot: HOT 102.7FM

Melanoom is in 1986 by Scott gediagnoseer en hy het sedertdien meermale behandeling ontvang, insluitend onlangse immunoterapie. Sy eksvrou, Sarah-Kate Accetta, wat saam met hom twee seuns, Matthew en Mark, het, het vroeër vanjaar ’n BackaBuddy-veldtog begin om sy mediese koste te help dek.

Sy het Dinsdag met ’n gebroke hart die nuus van sy dood gedeel: “Darren het van hierdie aarde af in die liefdevolle arms van Jesus oorgegaan.”

Sy het almal bedank wat bygedra, gebid en hom ondersteun het. “Dit het Darren hoop, waardigheid en die ongelooflike gawe gegee om geliefd te voel,” het sy geskryf. Sy het ook versoek vir gebede vir hul seuns, wat nou sonder hul pa moet voortgaan.

Darren Scott het in 2017 by OFM aangesluit. Foto: OFM Argief

Darren se loopbaan het oor meer as 40 jaar gestrek en hy het ’n bekende naam geword met sy werk by stasies soos OFM, Radio Bop, 5FM, Jacaranda FM, East Coast Radio en uiteindelik HOT 102.7FM, waar sy stem ’n hoeksteen van die stasie geword het.

Kollegas en vriende het hulde gebring aan sy uitsonderlike vermoë om met luisteraars te skakel. Gareth Cliff het gesê: “Darren was ’n baie spesiale ou wat geweet het hoe om met Suid-Afrikaners te praat – sonder nonsens, met warmte en opregtheid.”

John Robbie het hom as ’n “ware reus” in die bedryf beskryf. “Hy was nooit sonder ’n glimlag nie. Al het hy geweet die kanker is terug, het hy dit amper grappenderwys vertel. Maar jy kon aanvoel – hierdie keer is dit ernstig.”

Darren Scott het dekades lank kanker onder lede gehad. Foto: Facebook

Simon Parkinson van HOT 102.7FM het gesê: “Darren was die mees toegewyde radiopersoon wat ek ooit geken het. 

“Hy het soms twee regstreekse programme per dag gedoen – ontbyt in een provinsie en ’n laatmiddagprogram in ’n ander. Wie doen ses uur regstreekse radio elke dag? Darren Scott.”

Volgens Shane (Duke) Wellington het Scott ’n unieke talent gehad om ’n mens te laat voel asof hy net met jóú praat. Lloyd Madurai, die stigter van HOT 102.7FM, het vertel hoe Darren van die begin af daar was toe die stasie begin is. “Toe ek hom bel, het hy net gesê: ‘Ek’s in. Kom ons doen dit.’”

Radio Awards Hall of Fame

Vriend en kollega Will Scott het onthou: “Hy was my beste vriend lank voordat ons saam gewerk het. Hy het my geïnspireer om ’n loopbaan in radio te volg. Toe sy seun Mark gebore is, het hy twee jaar lank net geglimlag.”

Darren is verlede jaar tot die Radio Awards Hall of Fame toegelaat – ’n gepaste hulde aan ’n man wat alles vir radio gegee het. Terwyl sy seuns, sy familie en die land hom nou mis, bly sy nalatenskap in elke radio-ateljee waar sy stem eens gehoor is.

Soos Bunny Majaja dit treffend gestel het: “Radio sal jou nooit vergeet nie.”

Bronne: Times Live, News24, Maroela Media, Algoa FM

OFM Nuus mvh