Die luitenant-generaal (59) staan tereg op aanklagte wat verband hou met die beweerde seksuele toenadering tot ’n 16-jarige meisie en die beweerde verkragting van ’n 18-jarige. Lede van die Madlanga-kommissie se opvolgtaakspan het hom Maandag in hegtenis geneem.

Waarnemende polisieminister Firoz Cachalia veroordeel die beweerde optrede, maar beklemtoon die beskuldigde is steeds geregtig op ’n behoorlike regsproses en die vermoede van onskuld.

Kamogelo Mogotsi, die ministerie se woordvoerder, sê Cachalia beskou die bewerings as besonder ontstellend weens die senioriteit van die beampte en die verantwoordelikheid wat met die rang van luitenant-generaal gepaard gaan.

Waarnemende polisieminister Firoz Cachalia veroordeel die beweerde optrede. Foto: Facebook/SAPD

Volgens Mogotsi is dit die minister se standpunt dat polisiebeamptes die verantwoordelikheid het om die publiek te beskerm, die reg te handhaaf en die regte en waardigheid van vroue en kinders te beskerm.

Cachalia sê bewerings van seksoortredings teen polisiebeamptes moet sonder vrees of vooroordeel ondersoek word, ongeag die betrokke persoon se rang of posisie. “ ’n Polisiebeampte, en veral ’n senior polisiebeampte, word met enorme verantwoordelikheid vertrou om lede van die publiek te beskerm, die reg te handhaaf en die regte en waardigheid van vroue en kinders te beskerm.”

Die minister verbind die saak ook aan die breër stryd teen geslagsgeweld en vrouemoord. Volgens hom moet die polisie dieselfde standaarde in sy eie geledere toepas as wat van die publiek verwag word.

Die bewerings kom te midde van hernieude druk op die regering oor geweld teen vroue. Cachalia het na die onlangse ontdekking van die liggame van nege vroue in Ekurhuleni verwys as verdere bewys van vroue se kwesbaarheid en die staat se verantwoordelikheid om oortreders voor die gereg te bring.

Hy sê die polisie kan nie geloofwaardig die stryd teen geslagsgeweld lei terwyl geloofwaardige bewerings teen sy eie lede geïgnoreer word nie. Cachalia meen besliste en wettige optrede is nodig wanneer polisiebeamptes deur geloofwaardige bewerings van misdadige optrede in die gesig gestaar word.

Die saak bereik die volgende fase wanneer die luitenant-generaal in die hof verskyn en verdere aandag aan die aanklagte en sy aanhouding gegee word.

OFM Nuus cvs

• Het jy ’n nuuswenk om te deel? Bel of whatsapp die OFM Nuus-lyn 066 487 1427.