Agri Hour
Hartswater-gemeenskap steeds geskok oor Brand-moorde─── CHRISTAL-LIZE MULLER 01:22 Fri, 31 Jul 2020
Die Noord-Kaapse landbougemeenskap is steeds geskok oor die wrede aanval en moorde op 'n bejaarde egpaar, Danie Brand, sy vrou Breggie, en hul dogter Elzabie.
Die gesinslede, wat Sondag voor 12:00 nog op hul selfone in hul huis op 'n kleinhoewe in die Magogong-gebied beskikbaar was, is daarna deur hul aanvallers ontvoer. Die vermoorde gesinslede se liggame is Maandag in die Taung-gebied in Noordwes gevind. Willem Lauwrens, 'n boer van die Vaalhartsbesproeiingskema in die Noord-Kaap, sê die landbougemeenskap kan nie glo wat in hul midde gebeur het nie. Lauwrens het Donderdag in Hartswater die protesaksie deur die plaaslike gemeenskap, wat boere en plaaswerkers ingesluit het, bygewoon.
Gemeenskapslede het vreedsaam buite die plaaslike landdroshof saamgetrek om hul misnoeë uit te spreek teen dié aanval. Die gemeenksap het ook geëis dat borgtog nie aan die vyf verdagtes, waaronder 'n vrou, toegestaan moet word nie. OFM-nuus se Christal-Lize Muller het met Lauwrens gepraat...
Sien onderstaande PODCAST
Hy sê 'n groot getal mense het ter ondersteuning van die protesaksie opgedaag. Die gemeenskap is platgeslaan en geskok oor die voorval, maar " dinge moet loop soos dit moet loop." Lauwrens sê boere is ongelukkig oor dié dinge en dat daar nie genoeg gedoen word vir hulle in terme van veiligheid nie.
Hy sê plaaswerkers was ook deel van die konvooi wat na die landdroshof gery het en buite die hof byeen was. Sy boodskap aan medeboere is om meer paraat te wees, want gemeenskapsveiligheid moet opgeskerp word om aanvalle op plase en kleinhoewes te voorkom.
OFM-nuus